საბურთალოზე ფერდის ჩამოშლის გამო სამშენებლო სამუშაოები შეჩერდა
თბილისის მერიის ინფორმაციით, საბურთალოზე, დანელიას ქუჩაზე მიმდინარე სამშენებლო პროექტზე ფერდის ნაწილის ჩამოშლა დაფიქსირდა, რის შედეგადაც სამშენებლო მოედანზე არსებული მძიმე ტექნიკა დაზიანდა.
მერიაში განმარტავენ, რომ ობიექტზე მშენებლობა მოქმედი ნებართვის ფარგლებში მიმდინარეობდა, თუმცა მომხდარის შემდეგ თბილისის მუნიციპალური ინსპექცია-მ სამუშაოები დროებით შეაჩერა და სამშენებლო კომპანია უსაფრთხოების ნორმების დარღვევისთვის 30 000 ლარით დააჯარიმა.
საქმე ეხება ვაკის რაიონში მდებარე მიწის ნაკვეთს, სადაც მრავალბინიანი საცხოვრებელი კორპუსის კორექტირებული არქიტექტურული პროექტი მიმდინარე წლის 6 მარტს დამტკიცდა. დოკუმენტაციის მიხედვით, მშენებლობის დასრულების ვადად 2029 წლის 6 მარტია განსაზღვრული. პროექტის დამკვეთად კომპანია იდეა პანორამა 2 სახელდება.
მერიის ინფორმაციით, ფერდის ჩამოშლის ფაქტი 13 მაისს დაფიქსირდა. უწყებაში განმარტავენ, რომ შემთხვევის შედეგად დაირღვა საქართველოს მთავრობის მიერ დამტკიცებული მშენებლობის უსაფრთხოების ტექნიკური რეგლამენტი, რის გამოც სამართალდამრღვევის მიმართ შესაბამისი ადმინისტრაციული ზომები გატარდა.
ამასთან, ძალაში შევიდა სამშენებლო პროცესის შეჩერების გადაწყვეტილებაც. სამუშაოების განახლება მხოლოდ მას შემდეგ გახდება შესაძლებელი, რაც განხორციელდება ფერდის გამაგრების სამუშაოები და წარმოდგენილი იქნება შესაბამისი კონსტრუქციული პროექტი და საექსპერტო დასკვნა.
მერიის განმარტებით, გამაგრებითი ღონისძიებების მიზანია როგორც ფერდის მდგრადობის უზრუნველყოფა, ისე მიმდებარე შენობებისა და საგზაო ინფრასტრუქტურის უსაფრთხოების დაცვა. ასევე, სამუშაოების დასრულების შემდეგ კომპანიას დამატებითი საექსპერტო შეფასების წარდგენაც დაევალება, რომელიც დაადასტურებს, რომ ჩატარებული სამუშაოები სრულად შეესაბამება უსაფრთხოების მოთხოვნებს.
