საგნისა და პროფესიული უნარების გამოცდების ჩატარების წესში ცვლილებები შევიდა. განათლების, მეცნიერებისა და ახალგაზრდობის მინისტრის 1 აპრილის ბრძანების შესაბამისად, ცვლილების მიხედვით საგნისა და პროფესიული უნარების გამოცდების წესს შეეცვალა სახელი და საგნის გამოცდის ჩატარების წესად გადაკეთდა.
საგნის გამოცდის ჩატარების წესი განსაზღვრავს საჯარო სამართლის იურიდიული პირის – შეფასებისა და გამოცდების ეროვნული ცენტრის მიერ საგნის გამოცდის ჩატარებასთან დაკავშირებულ საკითხებს.
ახლებურად განიმარტა ტერმინი ტესტი – საგნის გამოცდის ჩატარების მიზნით, ცენტრის მიერ „ეროვნული სასწავლო გეგმისა“ და „მასწავლებლის პროფესიული სტანდარტის“ შესაბამისად შედგენილი ტესტური დავალებები და პასუხების ფურცლის ფორმა;
ბრძანებაში აღნიშნულია, რომ ტესტირებაში მონაწილეობის საფასური თითოეულ საგანში შეადგენს 50 ლარს. ტესტირება შესაბამის საგანში ყველა საგამოცდო ცენტრში მიმდინარეობს ერთდროულად. ტესტირება ერთ საგანში შესაძლოა ჩატარდეს ორი დღის განმავლობაში.
საგნობრივი კომისიის მიერ გადაწყვეტილებების მიღებიდან 20 დღის ვადაში ცენტრის დირექტორის ინდივიდუალური ადმინისტრაციულ-სამართლებრივი აქტით მტკიცდება იმ პირთა სია, რომელთაც წარმატებით აძლიეს საგნის გამოცდა.
საგნის გამოცდის წარმატებით ჩაბარება გულისხმობს ტესტში, ცენტრის წარდგინებით, განათლების მეცნიერებისა და ახალგაზრდობის მინისტრის მიერ დადგენილი ოდენობის ქულების დაგროვებას დამატებითი განმარტებისთვის – ბრძანებიდან ამოღებულია ყველა ის ინფორმაცია, რომელიც პროფესიული უნარების გამოცდას უკავშირდებოდა, ვინაიდან პედაგოგებისთვის აღარ ჩატარდება პროფესიული უნარების გამოცდები.
აღნიშნულის შესახებ ინფორმაცია წლის დასაწყისში გახდა ცნობილი, მას შემდეგ რაც ახალი სქემა გამოქვეყნდა.
აქვე შეგასენებთ, რომ პროფესიული უნარების ტესტირებაში მონაწილეობის უფლება ჰქონდა მასწავლებლის პროფესიული განვითარებისა და კარიერული წინსვლის სქემაში განაწილებულ უფროს ან წამყვან მასწავლებელს, რომელსაც ჩაბარებული ჰქონდა საგნის გამოცდა ან საგნობრივი კომპეტენცია დადასტურებული ჰქონდა არანაკლებ 50%-ანი შედეგით, ან უფროსი მასწავლებლის სტატუსი მინიჭებული ჰქონდა დოქტორის აკადემიური ხარისხის საფუძველზე.
