მეცნიერებმა კიბოს მკურნალობის რევოლუციური მეთოდი შეიმუშავეს – კვლევა

მეცნიერებმა შეიმუშავეს ინოვაციური მეთოდი, რომელიც კიბოს უჯრედებს სინათლის მეშვეობით ანადგურებს და ჯანმრთელ ქსოვილს უვნებლად ტოვებს.

კვლევა ტეხასის უნივერსიტეტისა (University of Texas at Austin) და პორტოს უნივერსიტეტის (University of Porto) მეცნიერებმა ჩაატარეს. მათი მიზანია ისეთი მკურნალობის შექმნა, რომელიც ქიმიოთერაპიასა და რადიაციულ თერაპიაზე უფრო მიზანმიმართული და ნაკლებად მავნე იქნება.

კვლევა ეფუძნება მეთოდს, რომელიც სინათლისა და ნანონაწილაკების გამოყენებით კიბოს უჯრედების სითბურ დასხივებასა და მათ განადგურებას გულისხმობს, თანაც ისე, რომ ჯანსაღი ქსოვილები არ დაზიანდეს.

მკვლევართა თქმით, ამ მეთოდს აქვს დიდი პოტენციალი, რადგან არ საჭიროებს ძვირადღირებულ აპარატურას — საკმარისია მარტივი LED-ნათურა და შესაბამისი ნანონაწილაკები. ეს ნიშნავს, რომ თერაპია მომავალში შესაძლოა ხელმისაწვდომი გახდეს იმ ქვეყნებშიც, სადაც თანამედროვე სამედიცინო ინფრასტრუქტურა ნაკლებად განვითარებულია.

პირველი შედეგები შთამბეჭდავია:

კანის კიბოს უჯრედების დაახლოებით 92% განადგურდა;
მსხვილი ნაწლავის კიბოს უჯრედების — დაახლოებით 50%.

მთავარი მიღწევა კი ის არის, რომ ამ პროცესში ჯანსაღი უჯრედები საერთოდ არ დაზიანებულა.

მეცნიერები ხაზგასმით აღნიშნავენ, რომ მკურნალობა ჯერ მხოლოდ ტესტირების ეტაპზეა და საჭიროა დამატებითი კლინიკური კვლევები ადამიანებზე. თუმცა, მათი აზრით, სინათლეზე დაფუძნებული ეს მიდგომა მომავალში კიბოს წინააღმდეგ ბრძოლის ერთ-ერთ ყველაზე პერსპექტიულ მიმართულებად შეიძლება იქცეს.