ადვოკატი მიხეილ შაყულაშვილი – „ოქროს ზოდი ირაკლი ღარიბაშვილს არ ჰქონია“ – ირაკლი ღარიბაშვილს სასამართლომ 1 მილიონი ლარის ოდენობის გირაო შეუფარდა – მან გირაო 30 დღის განმავლობაში უნდა გადაიხადოს

ყოფილ პრემიერ-მინისტრს ირაკლი ღარიბაშვილს საქალაქო სასამართლომ განსაკუთრებით დიდი ოდენობით უკანონო შემოსავლების ლეგალიზაციის საქმეზე აღკვეთის ღონისძიების სახით 1 მილიონი ლარის ოდენობის გირაო შეუფარდა. გადაწყვეტილება მოსამართლემ ეკა ბარბაქაძემ რამდენიმე წუთის წინ გამოაცხადა.

სასამართლომ სრულად დააკმაყოფილა პროკურატურის შუამდგომლობა. ყოფილმა პრემიერ-მინისტრმა აღნიშნული თანხა 30 დღის ვადაში უნდა გადაიხადოს. ასევე, დაკმაყოფილდა პროკურატურის შუამდგომლობა ქვეყნის ფარგლებს გარეთ გამგზავრების აკრძალვაზე.

ოქროს ზოდი ირაკლი ღარიბაშვილს არ ჰქონია, რომ ვიცოდე ოქროს ზოდს გაყიდის და გირაოს გადაიხდის. უნდა დავსხდეთ, გავისაუბროთ, რისი შესაძლებლობაა, ვის შეიძლება გამოართვა [გირაოს თანხა], – ამის შესახებ ჟურნალისტებს ყოფილი პრემიერ-მინისტრის, ირაკლი ღარიბაშვილის ადვოკატმა, მიხეილ შაყულაშვილმა განუცხადა.

მისივე თქმით, 6 მილიონი, რის უკანონოდ მიღებასაც საგამოძიებო უწყებები ირაკლი ღარიბაშვილს ედავებიან, 9 წლის განმავლობაში ბიზნესში ნორმალური თანხაა.

„დღეს ომი რომ არ არის, ზუსტად ეგ მოუტანა მან. ეს არგუმენტი იყო პიროვნების დამახასიათებელი ნაწილი. რაც შეეხება 4 ოქტომბერს და ღალატს, რაზე მივანიშნებდი და საზოგადოებაში არსებულ ნარატივზე, თითქოს ვიღაცამ ვიღაცას უღალატა და ღალატი, მე მგონი, ღვინის ინდუსტრია არ არის.

მანქანა იყო, ქარხანა იყო თუ მიწა იყო, თუ რაც იყო, მოხდება თუ არა ჩამორთმევა, ეს არ არის ჩვენი, დაცვის გადასაწყვეტი, ეს არის ბრალდების გადასაწყვეტი… ბიძინა ივანიშვილის სახლის ნაჩუქრობა და ა.შ. აქ არაფერ შუაში არაა. ჯერჯერობით არ ვიცი, რით მოხდება გირაოს გადახდა, ეს ქონების უზრუნველყოფა იქნება თუ თანხის შეტანა იქნება, თუ რაც იქნება, უნდა დავსხდეთ, გავისაუბროთ, რისი შესაძლებლობაა, ვის შეიძლება გამოართვა.

ოქროს ზოდი ირაკლი ღარიბაშვილს არ ჰქონია, რომ ვიცოდე ოქროს ზოდს გაყიდის და გირაოს გადაიხდის. 6 მილიონი 9 წლის განმავლობაში ნორმალური თანხაა ბიზნესში. სადაა ის საათები და რაღაცებს რომ აჩვენებდით? ამოღებულ ნივთებში სადაა? ოქმში ამოღებულია თქვენ მიერ ხსენებული თანხა, მობილური ტელეფონები და ლეპტოპი,“ – განაცხადა მიხეილ შაყულაშვილმა.

“ირაკლი ღარიბაშვილს ბრალი წარედგინა არა სხვა თანამდებობის პირებთან თანამშრომლობის, არა მათთან რაიმე დანაშაულებრივი კავშირის, არა რაიმე განზრახვის ან ბიზნეს ტერორის გამო, არამედ მას ბრალი წარედგინა კონკრეტულად 2016 წლის შემდეგ პერიოდში, როდესაც პირველი პრემიერ-მინისტრობის შემდეგ დატოვა თანამდებობა და გადავიდა კერძო ბიზნესში”, – ამის შესახებ ირაკლი ღარიბაშვილის ადვოკატმა, ლილი გელაშვილმა განაცხადა.

ირაკლი ღარიბაშვილს ბრალი საქართველოს სისხლის სამართლის კოდექსის 194-ე მუხლის მესამე ნაწილის „გ“ ქვეპუნქტით წარედგინა, რაც გულისხმობს უკანონო შემოსავლის ლეგალიზაციას, რასაც თან ახლდა განსაკუთრებით დიდი ოდენობით შემოსავლის მიღება. სისხლის სამართლის კოდექსით გათვალისწინებული ეს დანაშაული 9-დან 12 წლამდე პატიმრობას ითვალისწინებს.

გადმოწერე აპლიკაცია „შენი ექიმი“ – პირველი ქართული სამედიცინო პლატფორმა!