მსოფლიოში ამჟამად დემენციის შემთხვევები იმატებს. 2021 წელს ამ დიაგნოზით 57 მილიონი ადამიანი ცხოვრობდა, 2050 წლისთვის კი რაოდენობის 153 მილიონამდე გაზრდაა მოსალოდნელი. ამის მიუხედავად, ახალმა კვლევამ აჩვენა, რომ ახალგაზრდა თაობებში მსგავსი ნეიროდეგენერაციული პრობლემების რისკი სულ უფრო იკლებს.
მეცნიერებმა აშშ-ის, ევროპისა და ინგლისის მოსახლეობის ჯანმრთელობის მონაცემები გამოიყენეს და ისინი ე.წ. კროს-სექტორული კვლევის მეთოდით გააანალიზეს. აღმოჩნდა, რომ ბოლო დროს დაბადებული თაობების წარმომადგენლებში დემენციის ჩამოყალიბების შანსი ყველა რეგიონში ნაკლები იყო. ასევე, მსგავსი ტენდენცია ქალებში უფრო შესამჩნევად ფიქსირდებოდა, ვიდრე კაცებში.
სპეციალისტებმა ყურადღება 71 და უფრო მეტი ასაკის ადამიანებზე გაამახვილეს. მათ 4-წლიანი მონაცემები სხვადასხვა ასაკობრივი კატეგორიის მიხედვით დაყვეს. დადგინდა, რომ ხანდაზმულ თაობებთან შედარებით, უფრო ახალგაზრდებს ასაკობრივი დემენციის ნაკლები გამოვლინება აღენიშნებოდათ. აშშ-ში ეს მაჩვენებელი 21.1 % იყო, ევროპაში 38.9%, ხოლო ინგლისში — 28.3%.
“მაგალითად, აშშ-ში 81-85 წლის ადამიანებში დემენცია იმათ 25.1%-ს ჰქონდა, ვინც 1890-1913 წლებში იყო დაბადებული. შედარებისთვის, 1939-1943 წელს დაბადებულებში ეს მაჩვენებელი 15.5% იყო”, — აცხადებს კვინსლენდის უნივერსიტეტში მომუშავე ეკონომისტი, საბრინა ლენსენი.
იქიდან გამომდინარე, რომ მსოფლიოში ხანდაზმული მოსახლეობის რაოდენობა იმატებს, დემენციის შემთხვევებიც იზრდება. ამის მიუხედავად, ახალი კვლევის თანახმად, თავად პროცენტულობა იკლებს (მინიმუმ შესწავლილ ჯგუფებში მაინც).
ნაშრომი გამოცემაში JAMA Network Open გამოქვეყნდა.
