სიმპტომი, როგორიცაა მუდმივი დაღლილობა, გვხვდება ბევრი პათოლოგიის დროს და ის არ არის სპეციფიკური.
თუ თქვენ გადახედეთ ცხოვრების წესს (დაიწყეთ მეტი დასვენება, ნაკლები მუშაობა და მოიწესრიგეთ ძილი), მაგრამ დაღლილობის გრძნობა არ გაქრა, მიზეზების გასარკვევად უნდა მიმართოთ ექიმს.
ექიმმა შეიძლება დანიშნოს შემდეგი ანალიზები:
1. სისხლის საერთო ანალიზი. ის აჩვენებს ჰემოგლობინის და სისხლის სხვა კომპონენტების დონეს – და მათ თანაფარდობას. სისხლის წითელი უჯრედების (ერითროციტები) და/ან ჰემოგლობინის დონის დაქვეითების, ანემიის დროს, დაღლილობა და სისუსტე საკმაოდ გამოხატული იქნება.
2. რკინა, ფერიტინი. თუ ჰემოგლობინი ნორმალურია, ეს არ ნიშნავს, რომ ორგანიზმში საკმარისი რკინაა. ისეთი მაჩვენებლების განსაზღვრა, როგორიცაა რკინა და ფერიტინი, დაგეხმარებათ რკინის ფარული დეფიციტის დიაგნოსტირებაში.
3. ფარისებრი ჯირკვლის მასტიმულირებელი ჰორმონი (TSH). ჰორმონი, რომელიც სინთეზირდება ჰიპოფიზის ჯირკვალში და არეგულირებს ფარისებრი ჯირკვლის ფუნქციას. დაღლილობა ხშირად ჩნდება, როდესაც ამ ჰორმონის დონე იზრდება.
4. ვიტამინი D. D ვიტამინის დონე 25-OH სისხლში მიუთითებს მის რეზერვზე ორგანიზმში. D ვიტამინის დაბალმა დონემ ასევე შეიძლება გამოიწვიოს ძილიანობა, დაღლილობა და შრომის უნარის დაქვეითება.
გარდა ამისა, დაღლილობა დაბალ არტერიულ წნევასთან ერთად ახალგაზრდა ასაკში შეიძლება მიუთითებდეს იშვიათ მდგომარეობაზე, რომელსაც თირკმელზედა ჯირკვლის უკმარისობა ეწოდება. ამ დაავადების დიაგნოსტიკა რთულია, ამიტომ მის დასადგენად საჭირო ანალიზები და კლვევები მხოლოდ ექიმთან ვიზიტის შემდეგ უნდა ჩაიტაროთ.
- D ვიტამინის 25(OH)D დონე იზომება ნანოგრამი მილილიტრზე (ნგ/მლ ან ng/ml) და ოპტიმალური კონცენტრაციაა 30-70 ნგ/მლ. თუ 25(OH)D კონცენტრაცია 10-20 ნგ/მლ ფარგლებშია, ორგანიზმში არსებობს D ვიტამინის დეფიციტის რისკი, 5-10 ნგ/მლ მიუთითებს D ვიტამინის დეფიციტზე, ხოლო 5 ნგ/მლ-ზე ნაკლები მნიშვნელობა მიუთითებს D ვიტამინის მძიმე დეფიციტზე. 25(OH)D კონცენტრაცია 70 ნგ/მლ-ზე მეტი მიუთითებს დოზის გადაჭარბებაზე.
25(OH)D-ის შემცირებული დონე შეინიშნება D ვიტამინის დაბალი მიღებით საკვებიდან, მზის ნაკლებობით, ნაწლავებიდან აბსორბციის პრობლემებით (მალაბსორბციის სინდრომი), ნეფროზული სინდრომით, ღვიძლის დაავადებებით და რიგი წამლების მიღებით (ფენიტოინი, ფენობარბიტალი, რიფამპიცინი და ა.შ.). ბოლო ორ შემთხვევაში საუბარია არა შემომავალი D ვიტამინის დეფიციტზე, არამედ მისი მეტაბოლიზმის პროცესის დარღვევაზე.
25(OH)D-ის მომატებული დონე მიუთითებს D ვიტამინის შემცველი წამლების გადაჭარბებულ მოხმარებაზე.
