აკრედიტაციის მიღება საქართველოში მოქმედი ყველა საავადმყოფოსთვის სავალდებულო ხდება…

საქართველოში სამედიცინო დაწესებულებების საერთაშორისო აკრედიტაცია სავალდებულო ხდება

საქართველოში სამედიცინო დაწესებულებების საერთაშორისო აკრედიტაციის პროცესი დაიწყო. მთავრობის დადგენილების თანახმად, 2025 წლის იანვრიდან საყოველთაო ჯანდაცვის პროგრამაში ჩართული ყველა სამედიცინო დაწესებულება ვალდებული იქნება საერთაშორისო აკრედიტაცია გაიაროს.

„აკრედიტაცია კანადა” — საქართველოში

საერთაშორისო აკრედიტაციის ორგანიზაციას „აკრედიტაცია კანადა” საქართველოში საზოგადოებრივი ჯანდაცვის ექსპერტი გიორგი ფხაკაძე წარმოადგენს. მისი განცხადებით, ორგანიზაციამ მსოფლიოს 40-მდე ქვეყანაში 15 000-მდე სამედიცინო დაწესებულებას დაეხმარა საერთაშორისო სტანდარტების დანერგვაში.

ორგანიზაციამ საქართველოში უკვე გახსნა ადგილობრივი ოფისი, რომელიც ქართველ ექსპერტებს მოამზადებს. ეს სპეციალისტები შემდგომში კლინიკებს საერთაშორისო სტანდარტების დაკმაყოფილებაში დაეხმარებიან.

გიორგი ფხაკაძე აღნიშნავს, რომ ქვეყანა გადადის რაოდენობრივი მოდელიდან ხარისხიანი ჯანდაცვის მოდელზე, რათა სამედიცინო მომსახურება სრულყოფილი და მაღალი დონის იყოს. ის მოუწოდებს კლინიკებს, დაუყოვნებლივ დაიწყონ მზადება, ვინაიდან პროცესს რამდენიმე თვიდან ერთ წლამდე შეიძლება დასჭირდეს.

- Advertisement -

აკრედიტაციის კრიტერიუმები

საერთაშორისო აკრედიტაცია მსოფლიოს ყველა კლინიკაში ერთიანი სტანდარტების მიხედვით ფასდება. შეფასების ძირითადი კრიტერიუმებია:

პაციენტსა და თანამშრომელზე ორიენტირება — სამედიცინო მომსახურების ცენტრში ადამიანის ინტერესების დაყენება; უსაფრთხოება — პაციენტისა და პერსონალის დაცვის გარანტიები; ხარისხისა და კლინიკური რისკის მართვა — სამედიცინო გადაწყვეტილებების სისტემატური კონტროლი; ინფორმაცია და კომუნიკაცია — მონაცემების სწორი მართვა და გამჭვირვალე ურთიერთობა; ხელმძღვანელობის პრაქტიკა — ინსტიტუციური მართვის ეფექტურობა.

დოკუმენტაციის პირველი ეტაპი — 2023 წლის ბოლო

2023 წლის ბოლომდე სამედიცინო დაწესებულებებს პირველი ეტაპის ვადა ეწურებათ: ამ პერიოდში კლინიკებმა აკრედიტაციის გამცემ ორგანიზაციასთან კონტრაქტი უნდა გააფორმონ და საჭირო დოკუმენტაცია წარადგინონ. ყველა სამედიცინო დაწესებულება ამჟამად მზადების აქტიურ ფაზაშია, ხოლო საერთაშორისო აკრედიტაცია კლინიკების ნაწილს უკვე მოპოვებული აქვს.

Vivo Medical Group — მზადება უკვე მიმდინარეობს

კერძო სექტორის მხრიდან მზადება უკვე აქტიურად მიმდინარეობს. სამედიცინო ცენტრების გაერთიანება Vivo Medical Group აცხადებს, რომ სტანდარტების ანალიზი და შესაბამისობის შეფასების ფაზა დასრულებულია, ხოლო ოქტომბრიდან განხორციელების ეტაპი იწყება. ჰოლდინგი ვარაუდობს, რომ აკრედიტაციას ერთი წლის განმავლობაში მიიღებს.

ჯგუფის ბიზნეს პროცესების განვითარების დეპარტამენტის უფროსი ირინა მეზურნიშვილი პროცესს მასშტაბურ ტრანსფორმაციად აფასებს:

- Advertisement -

„სისტემების შექმნის კუთხით ეს არის ძალიან დიდი ტრანსფორმაცია. ერთი წლის განმავლობაში ჩვენ ვცდილობთ დავაკმაყოფილოთ ის აუცილებელი და საბაზისო მოთხოვნები, რასაც სტანდარტი გვთხოვს. პაციენტი გაუმჯობესებას იგრძნობს როგორც კლინიკური, ისე ადმინისტრაციული თვალსაზრისით. ორგანიზაცია ხდება უფრო მაღალხარისხიანი და უფრო პაციენტზე კონცენტრირებული,” — განაცხადა ირინა მეზურნიშვილმა.