ყაზახეთის ყოფილმა მინისტრმა ცოლი ცემით მოკლა, იქამდე კი, დასაშანტაჟებლად ინტიმური ვიდეო გადააღებინა – მკვლელობის დეტალები

ყაზახეთში ეროვნული ეკონომიკის ყოფილმა მინისტრმა კუანდიკ ბიშიმბაევმა რამდენიმე თვის წინ მეუღლე სალტანატ ნუკენოვა მოკლა. თუმცა, რაც უფრო მეტი დრო გადის დანაშაულიდან, გარდაცვლილი ქალის ახლობლები იმედს კარგავენ, რომ დამნაშავე დაისჯება. ოჯახი მის დაპატიმრებას ითხოვს, თუმცა მაღალი რანგის თანამდებობის პირმა ამ საქმიდან თავის დახსნა მოახერხა.

სალტანატ ნუკენოვას ოჯახის წევრები ამბობენ, რომ გოგონა ძალიან კარგი, მხიარული და კეთილი ადამიანი იყო. საკუთარი ნიჭით, შრომით, სწავლითა და მონდომებით მიაღწია წარმატებას და დამოუკიდებლად ცხოვრობდა.

სალტანატი 2023 წლის 9 ნოემბერს გარდაიცვალა. იმ დღეს ის და მისი მეუღლე კონცერტზე იმყოფებოდნენ, თუმცა, როგორც ცნობილია, მათ იკამათეს და დარბაზი მალევე დატოვეს. შემდეგ კი ოჯახის კუთვნილ რესტორანში წავიდნენ და ვიაიპი-ოთახში შევიდნენ. სალტანატი ამბობდა, რომ მუდმივი ბულინგითა და ქმრის მხრიდან ძალადობით დაიღალა და ქმართან დაშორება უნდოდა. ირკვევა, რომ კუანდიკი ცოლს გამუდმებით სცემდა. როცა ცუდ ხასიათზე იყო, ეუბნებოდა, რომ ტანსაცმელი გაეხადა, იმიტომ, რომ “მან უყიდა“. ამცირებდა და ნახევრად შიშველს სცემდა. იგივე სცენარი განმეორდა საბედისწერო დღეს, რესტორანში.

როგორც ცნობილია, ყოფილი მინისტრი ცოლს რამდენიმე საათის განმავლობაში ჩაკეტილ ოთახში სცემდა და მხოლოდ მაშინ გაჩერდა, როდესაც გოგონამ გონება დაკარგა და ძირს დაეცა. როცა მამაკაცმა გააცნობიერა, რაც მოხდა, რესტორნის თანამშრომლები დაითხოვა და ძმას დაურეკა. ასევე, მეუღლის ტელეფონს ლოკაცია გამოურთო, რომ ოჯახს მისი მოძებნა ვერ შეძლებოდა.

სასწრაფო დახმარება არ გამოიძახა. მამაკაცები ბჭობდნენ, რა გაეკეთებინათ. სანამ სათვალთვალო კამერებიდან ყველა ვიდეო წაშალეს და შემდეგ გადაწყვიტეს, სასწრაფო დახმარებისათვის დარეკვა, 31 წლის ქალი უკვე გარდაცვლილი იყო…

იმის გამო, რომ ამ ამბავს ყაზახეთში ძალიან დიდი გამოხმაურება მოჰყვა და ხალხი აღშფოთდა, ყოფილი მინისტრი დააპატიმრეს და 2 თვით ციხეში ჩასვეს. როგორც ამბობენ, შემდეგ მან მოსამართლე მოისყიდა და გაათავისუფლეს.

გოგონას ახლობლებმა იცოდნენ, რომ ქმარი მასზე ძალადობდა. თუმცა, ვერაფერს აკეთებდნენ. გარდაცვლილმა ერთხელ ნათესავს ფოტოებიც კი გადაუგზავნა, როგორ იყო ნაცემი. როცა მისმა ქმარმა ამის შესახებ გაიგო, კიდევ უფრო მეტად სცემა და აიძულა, ინტიმური შინაარსის ვიდეო გადაეღო.

“2023 წლის აპრილში, ბიშიმბაევმა, როდესაც შეიტყო, რომ ნუკენოვას ნათესავებს ჰქონდათ ფოტოები, სადაც ძალადობის კვალი აშკარა იყო და ცოლს ამით შეეძლო, მისგან თავი დაეხსნა, შიშველს ვიდეო გადააღებინა, რომ დაეშანტაჟებინა და ვეღარ დაშორებოდა.” – ამბობს პროკურორი.

სალტანატის ახლობლები იმაშიც დარწმუნებულები არიან, რომ ბიშიმბაევი ნარკოტიკულ საშუალებებს იღებდა. შესაბამისად, არც იმ დასკვნას ენდობიან, რომლის თანახმადაც, მამაკაცის ორგანიზმში ნარკოტიკი არ აღმოჩნდა და ალკოჰოლიც მცირე დოზით იყო.

ცნობილია ასევე ისიც, რომ პოლიციამ წაშლილი ვიდეოების აღდგენა მოახერხა, სადაც ჩანს, რომ სალტანატს ქმარი სასტიკად უსწორდება. ყოფილი მინისტრი დანაშაულს არ აღიარებს და ამბობს, რომ ეს მის მიმართ აგორებული უსაფუძვლო სკანდალია და რომ ცოლი მას არ მოუკლავს.

როგორც მედიაში წერენ, შემდეგი სასამართლო სხდომა 29 მარტს გაიმართება. გარდაცვლილი გოგონას ახლობლები დარწმუნებულები არიან, რომ სამართლის პოვნას ვერ მოახერხებენ.