Starring Georgia-ს ფარგლებში, „დინამო არენაზე“ ჯასტინ ტიმბერლეიკის კონცერტი გაიმართება. პოპ-მუსიკის ერთ-ერთი ყველაზე პოპულარული შემსრულებელი კონცერტს 23 ივლისს „დინამო არენაზე“ გამართავს.
ბილეთების გაყიდვა დაიწყება 8 პარილს, 12:00 საათზე TKT.ge/JustinTimberlake-ზე.
ღონისძიების ორგანიზატორთა ინფორმაციით, Starring Georgia-ს მუსიკალური ოდისეის ლოიალურ თანამგზავრებს, Starring Card-ის მფლობელებს ექნებათ შესაძლებლობა, ისარგებლონ Pre Sale-ით და ლიმიტირებული რაოდენობის ბილეთები ერთი დღით ადრე შეიძინონ. მათივე ცნობით, წინასწარი გაყიდვა 7 აპრილს, 12:00 საათზე TKT.ge-ზე დაიწყება.
„ჯასტინ ტიმბერლეიკი მრავალმხრივი შემსრულებელი, მუსიკოსი, პროდიუსერი, კომპოზიტორი და მსახიობია. მსოფლიოს მასშტაბით, გაყიდულია მისი 54 მილიონზე მეტი ალბომი და 63 მილიონი სიმღერა. არტისტის კარიერა 30 წლის წინ ცნობილი ბოიბენდის, *NSYNC-ის სოლისტად დაიწყო. ამ ბენდთან ერთად, მან 70 მილიონი ჩანაწერი გაყიდა. ჯასტინ ტიმბერლეიკს პოპ, დენს და R&B ჟანრებში GRAMMY-ს ათი ჯილდო აქვს მოპოვებული, მათ შორის, წარმატებული სოლო ალბომებისთვის – Man of the Woods, The 20/20 Experience, FutureSex/LoveSounds და მისი სადებიუტო სოლო ალბომისთვის – Justified. გარდა ამისა, ჯეი-ზისთან კოლაბორაციით, არტისტმა მსოფლიოში 23 მილიარდზე მეტი აუდიო და ვიდეოსტრიმი მოიპოვა; ასევე მიიღო Emmy-ის ოთხი ჯილდო საღამოს მუსიკალურ-იუმორისტულ შოუ Saturday Night Live-ში მისი დასამახსოვრებელი გამოსვლებისთვის.
ჯასტინ ტიმბერლეიკს გახმოვანებული აქვს DreamWorks-ის ანიმაციური მიუზიკლი TROLLS-ს. მისი ჰიტად ქცეული სიმღერა Can’t Stop the Feeling 2017 წელს გამოსული Trolls Holiday-იდან, „ოსკარზე“ წლის „საუკეთესო ორიგინალური სიმღერის“ ნომინაციაში იყო წარდგენილი. არტისტმა ახლახან გამოუშვა მეექვსე სტუდიური ალბომი Everything I Thought It Was, რომელიც 18 ახალ სიმღერას შეიცავს, მათ შორის ჰიტებს: Selfish და No Angels. 23 ივლისს „დინამო არენაზე“ შეკრებილ ათიათასობით მელომანს შესაძლებლობა ექნება, მოუსმინონ საყვარელ ჰიტებს და ამასთანავე, უახლესი ალბომის სიმღერებს“, – ნათქვამია ღონისძიების ორგანიზატორთა მიერ გავრცელებულ ინფორმაციაში.
