1-ელ მარტს, სავარაუდოდ, ნარკოტიკების ზედოზირებით სამტრედიის მუნიციპალიტეტში 22 წლის ახალგარზდა კაცი დაიღუპა. მასთან ერთად მყოფს კი ბრალი წარედგინა. ინფორმაცია გუშინ პროკურატურამ გაავრცელა.
გამოძიების თანახმად ორმა პირმა, ქალმა და მამაკაცმა შემდგომში გასაღების მიზნით პოლიეთილენის პარკებში დაფასოებული დიდი ოდენობით ნარკოტიკული ნივთიერება მეტადონი, სამტრედიის მუნიციპალიტეტის ერთ-ერთ სოფელში მიიტანეს და მდინარის პირას ლოკაციებზე განათავსეს, შემდეგ კი ნარკოტიკი თავადაც მოიხმარეს.
გარდაცვლილი ახალგაზრდა 22 წლის არჩილ ბარდაველიძეა, მასთან ერთად მყოფი 19 წლის ანა გუდავა ნარკოტიკების რეალიზაციის ბრალდებით არის დაკავებული. გავრცელებული ინფორმაციით, წყვილი თერჯოლის მუნიციპალიტეტის სოფელ ბარდუბანში გარდაცვლილის სახლში იმყოფებოდა, როდესაც ნარკოტიკი თავადაც მოიხმარეს. რამდენიმე საათში ახალგაზრდა კაცი, სავარაუდოდ, ზედოზირების შედეგად დაიღუპა. როგორც გაირკვა, დაკავებული გოგონა აჭარის განათლების, კულტურისა და სპორტის სამინისტროში კულტურის დეპარტამენტის აწ უკვე ყოფილი უფროსის, თამარ გუდავას ქალიშვილია. მან თანამდებობის დატოვების თაობაზე 5 მარტს განაცხადა, მას მერე, რაც მომხდარი გახმაურდა. უნდა აღინიშნოს, რომ მისი ქალიშვილი უკვე 2 მარტს იყო დაკავებული.
ambebi.ge თერჯოლის მუნიციპალიტეტის სოფელ ბარდუბნის მკვიდრს, გარდაცვლილი ბიჭის მეზობელს ესაუბრა.
“გარდაცვლილი 19 წლის არჩილ ბარდაველიძეა, ჩვენი მეზობელი. აჩიკო პერიოდულად სხვადასხვა ადგილას მუშაობდა, ჯერ ქუთაისში, ბოლო დროს კი ბათუმში იყო. ეტყობა, ცუდ წრეში ჩავარდა, იმ გოგონასთან ერთად ყოფილა, რომელიც მისი გარდაცვალების შემდეგ დააკავეს. რომ გითხრათ, რამეში შემჩნეული იყო, მოგატყუებთ, მაგრამ სოფლიდან რომ წავიდოდა, მერე რას აკეთებდა, ვინ რა იცის. აჩიკოს მამა 6 წელია, რაც გარდაიცვალა, დედა მშრომელი ქალია, სათბურებში დადიოდა სამუშაოდ. აჩიკოსთან კარგი ურთიერთობა გვქონდა, სუფრებზეც ხშირად ვხვდებოდით, რას წარმოვიდგენდი, ასეთ საქმეში თუ იყო ჩაბმული. კი, არის ვერსია, რომ ზედოზირებით გარდაიცვალა, მაგრამ ჭორებზე რა ვთქვა. ჩვენ როცა მივედით, აჩიკოს ცხედარი უკვე ექსპერტიზაზე იყო გადასვენებული, ვიდრე პასუხი არ მოვა, ძნელია რამის თქმა… ორშაბათ ღამე მოასვენეს, 4 საათის მერე…
აჩიკოს ოჯახის წევრები შინ არ იყვნენ, დედა სამუშაოდ იყო წასული. მას ორი და ჰყავს, მათგან ერთი საზღვარგარეთ იმყოფებოდა, მეორე კი ბათუმშია გათხოვილი. სხვათაშორის, აჩიკო გარდაცვალების წინა დღეს ჩამოსულა ბათუმიდან. მეზობლებმა დარეკეს და როცა სასწრაფო დახმარება მოსულა, ბიჭი უკვე გარდაცვლილი იყო. მოვიდა პოლიციაც და სასწრაფომ ექსპერტიზაზე გადაიყვანა. რამდენიმე კვირაში დასკვნა ცნობილი გახდება. წარმოუდგენელი და შოკისმომგვრელი ამბავია, ამას ვერაფრით წარმოვიდგენდით“, – გვითხრა მან.
როგორც ტელეკომპანია “ფორმულა“ აცხადებს, ანა გუდავა, რომელიც არჩილ ბარდაველიძესთან ერთად იმყოფებოდა, დილიდან ცდილობდა მეგობრის მდგომარეობიდან გამოყვანას, დასახმარებლად დაურეკა ორ მეგობარს მანამ, ვიდრე 112-ში დარეკავდნენ. “ფორმულასვე” ინფორმაციით, თითქოს გარდაცვლილს თავის არეში აღენიშნება დაზიანება.
გარდაცვლილის და, მეგი ბარდაველიძე სოციალურ ქსელში წერს:
“ჩემი მკვდარი ძმაააც გარიეეეე, ცოცხალს არ ინდობდიიი, მკვდააარზეეეც რაები ილაპარაკეე, ვინ იციიიის…”
“ჩემს ძმას ვინც უსამართლოდ და არასწორად მოექცა, ყველას უფალი გადაუხდისს!!! იგივეს ვუსურვებ ყველას, რასაც ეხლა ჩვენ განვიცდით!!!” – წერს არჩილ ბარდაველიძის მეორე და მაგდა ბარდაველიძე.
გავრცელებული ინფორმაციით, შემთხვევის ადგილზე ჩატარდა ჩხრეკა, ამოიღეს 70 გრამამდე ნარკოტიკი, რომელიც სულ ცოტა 300 ადამიანზე მაინც იყო გათვლილი. როგორც ირკვევა, ქალი საკუთარ ჩვენებაში ყვება, რომ ნარკოტიკული საშუალება მას ეკუთვნოდა.
“მას ბრალდება საქართველოს სისხლის სამართლის კოდექსის 19, 260-ე მუხლის მეხუთე ნაწილის „ბ“ ქვეპუნქტით და მეშვიდე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების ჯგუფურად გასაღების მცდელობის ფაქტი) წარედგინა, რაც სასჯელის სახედ და ზომად თოთხმეტიდან ოც წლამდე ან უვადო თავისუფლების აღკვეთას ითვალისწინებს. პროკურატურის შუამდგომლობის საფუძველზე, სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა”, – ნათქვამია პროკურატურის ინფორმაციაში.
მასალის გამოყენების პირობები
