ჩაძირულ ძვირადღირებულ იახტაზე მყოფი ადამიანების ძებნაში წყალქვეშა რობოტი ჩაერთო

იტალიური სახანძრო სამსახურის, „Vigili del Fuoco“-ს ცნობით, პორტიჩელოს სანაპიროსთან მუშაობა მყვინთავებმა სამშაბათს, დილის 8 საათზე განაახლეს.

„ბოლო ჩაყვინთვის დროს, რომელიც გუშინ გვიან ღამით განხორციელდა, სახანძრო ბრიგადის მყვინთავებმა ჩაძირულ იახტაში შეღწევა და მართვის პანელის ქვეშ მდებარე რამდენიმე ოთახის შემოწმება მოახერხეს. მრავალი დაბრკოლებისა და მისასვლელი ადგილების სივიწროვის გამო, ამის გაკეთება ძალიან რთული იყო“, – ნათქვამია იტალიის სახანძრო სამსახურის განცხადებაში.

„სამძებრო ჯგუფი წყლის სიღრმეებში მუშაობაზე სპეციალიზებული ორი მყვინთავისგან შედგება, რომლებიც 12 წუთის განმავლობაში უწყვეტად მუშაობენ და ამის შემდეგ, მათ ახალი გუნდი ცვლის“.

სახანძრო სამსახურის ცნობით, ჩაძირულ იახტაში შეღწევის მიზნით, დაგეგმილია ოპერაცია უფრო მოსახერხებელი მისასვლელი წერტილების მოსაძიებლად. იახტის ჩაძირვის დროის გათვალისწინებით (ადრიანი დილა), მყვინთავებს კაიუტებში შეღწევა სურთ, იმ ვარაუდით, რომ ბორტზე მყოფები, შესაძლოა, საწოლში იყვნენ.

„Vigili del Fuoco“-ს წარმომადგენლების თქმით, იახტის გარე ფანჯრებიდან და ჭრილებიდან ვინმეს დანახვას ისინი, ჯერჯერობით, ვერ ახერხებენ.

იტალიის სანაპირო დაცვის სამსახურის მიერ გადაღებულ კადრებში ჩანს, როგორ ემზადებიან სამძებრო ჯგუფის წევრები დისტანციური მართვის მანქანის განსათავსებლად