ჭიათურისა და საჩხერის მიტროპოლიტმა, მეუფე დანიელმა (დათუაშვილი), სრულიად საქართველოს კათოლიკოს-პატრიარქის გარდაცვალებასთან დაკავშირებით აღნიშნა, რომ მისი გადასვლა დიდმარხვის პერიოდში და სწორედ მიმდინარე წელს განსაკუთრებულ მნიშვნელობას ატარებს და ეს გარემოება შემთხვევითი არ არის.
მისი თქმით, მრევლი ემზადებოდა მნიშვნელოვანი თარიღისთვის — პატრიარქობის 50 წლის აღსანიშნავად, ხოლო ექიმების შეფასებით, მიუხედავად ასაკისა და ქრონიკული დაავადებების არსებობისა, პატრიარქის მდგომარეობა სტაბილურად ფასდებოდა და სიცოცხლის გაგრძელება კიდევ რამდენიმე წლით შესაძლებლად მიიჩნეოდა.
მეუფე დანიელის განმარტებით, ჯანმრთელობის მდგომარეობის მოულოდნელი გაუარესება ერთგვარ შემთხვევით მოვლენას უკავშირდება, თუმცა მისი აზრით, საბოლოო ჯამში ეს ღვთის ნებით მოხდა. როგორც მან აღნიშნა, საკვების მიღების დროს განვითარებულმა გართულებამ გამოიწვია ძლიერი დისკომფორტი და წნევის მკვეთრი დაცემა, რამაც საერთო მდგომარეობა გააუარესა.
მისივე ინფორმაციით, შემდგომში გამოვლინდა, რომ პროცესს თან ახლდა წყლულიდან სისხლდენა, რომელიც დაგვიანებით დადგინდა. აღნიშნულმა ფაქტორებმა მნიშვნელოვნად გაართულა მდგომარეობა და ქირურგიული ჩარევა უკვე შეუძლებელი გახდა. როგორც მიტროპოლიტმა აღნიშნა, მოვლენები სწრაფად განვითარდა და მდგომარეობა მოკლე დროში კრიტიკულ ნიშნულამდე მივიდა.
მეუფე დანიელის შეფასებით, პატრიარქის გარდაცვალებას შეიძლება ჰქონდეს სიმბოლური დატვირთვაც, რაც უკავშირდება იმ სულიერ პროცესებსა და ღირებულებებს, რომელთა გაძლიერებასაც იგი წლების განმავლობაში ემსახურებოდა. მისი თქმით, ეს მოვლენა შესაძლოა საზოგადოებისთვის ერთგვარი გარდატეხის დასაწყისი გახდეს და ერთიანობისკენ მიმართული პროცესები გააძლიეროს.
ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე, 93 წლის ასაკში გარდაიცვალა. მის გარდაცვალებასთან დაკავშირებით ქვეყანაში გლოვა გამოცხადდა, რომელიც დაკრძალვის დღემდე გაგრძელდება. პატრიარქის დაკრძალვა 22 მარტს, სიონის საკათედრო ტაძარშია დაგეგმილი.
ცნობისთვის, საქართველოს კათოლიკოს-პატრიარქი ილია მეორე 2026 წლის 17 მარტს, 93 წლის ასაკში გარდაიცვალა. საქართველოს კათოლიკოს-პატრიარქს ილია მეორეს სიონის ტაძარში 22 მარტს დაკრძალავენ
