შალვა პაპუაშვილი: „როგორ შეიძლება, ეკლესიის მმართველებს ეგზარქოსი უწოდო და იმ რიგში იდგე? როგორ შეიძლება, პატრიარქს პრორუსი უწოდო და იმ რიგში იდგე? როგორ შეიძლება, ეკლესიას ბნელი უწოდო და იმ რიგში იდგე? ეს არის ხალხი, რომელმაც „ენა, მამული, სარწმუნოებიდან“ სარწმუნოება ამოიღო და სხვა სიტყვა ჩასვა“

საქართველოს პარლამენტის თავმჯდომარემ, შალვა პაპუაშვილმა, გააკრიტიკა ის პირები, რომლებიც, წარსულში ეკლესიას და მის ხელმძღვანელებს უარყოფითად აფასებდნენ, თუმცა გარკვეულ ღონისძიებებში მაინც მონაწილეობდნენ. პაპუაშვილის შეფასებით, წინააღმდეგობრივია, როდესაც ადამიანები ეკლესიის მმართველებს აკრიტიკებენ, პატრიარქს პოლიტიკურ იარლიყებს აკერებენ ან ეკლესიას შეურაცხმყოფელი ტერმინებით მოიხსენიებენ და ამავე დროს საჯარო რელიგიურ ღონისძიებებში მონაწილეობენ.

მისივე თქმით, ასეთი პოზიცია მიუთითებს ღირებულებითი თანმიმდევრობის ნაკლებობაზე. პაპუაშვილმა ასევე აღნიშნა, რომ არსებობენ ჯგუფები და ინდივიდები, რომლებიც, მისი შეფასებით, წლების განმავლობაში აკრიტიკებდნენ ეკლესიას და მის წარმომადგენლებს, რის ფონზეც მათი მონაწილეობა მსგავს პროცესებში კითხვებს აჩენს.

ჟურნალისტის კითხვაზე, ეხებოდა თუ არა მისი შეფასება ყველა იმ ადამიანს, ვინც კონკრეტულ ღონისძიებაში მონაწილეობდა, პაპუაშვილმა განაცხადა, რომ, მისი აზრით, იქ ძირითადად წარმოდგენილი იყვნენ ის პირები, რომლებიც საკუთარ თავს ეკლესიისა და საზოგადოების ნაწილად მიიჩნევენ.

როგორ შეიძლება, ეკლესიის მმართველებს ეგზარქოსი უწოდო და იმ რიგში იდგე? როგორ შეიძლება, პატრიარქს პრორუსი უწოდო და იმ რიგში იდგე? როგორ შეიძლება, ეკლესიას ბნელი უწოდო და იმ რიგში იდგე? ეს არის ხალხი, რომელმაც „ენა, მამული, სარწმუნოებიდან“ სარწმუნოება ამოიღო და სხვა სიტყვა ჩასვა. ისიც ვერ მოითმინეს, რამდენიმე დღე გაჩუმებულიყვნენ. ამ დღეებშიც იმავეს იმეორებდნენ, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

- Advertisement -

მან ასევე ყურადღება გაამახვილა პარლამენტის წევრების როლზე და აღნიშნა, რომ მათ ქვეყნის სხვადასხვა მნიშვნელოვან მომენტში წარმომადგენლობითი ფუნქცია აკისრიათ. მისი თქმით, ასეთ შემთხვევებში მონაწილეობა არა მხოლოდ პირადი არჩევანია, არამედ საზოგადოების წინაშე პასუხისმგებლობასაც უკავშირდება.

ცალკე შეეხო სალომე ზურაბიშვილის საკითხსაც და განაცხადა, რომ მისი განცხადებები ეკლესიის მიმართ წინააღმდეგობრივია. პაპუაშვილის შეფასებით, ზურაბიშვილის მხრიდან გაკეთებული ზოგიერთი განცხადება, მათ შორის მსოფლიო პატრიარქთან დაკავშირებული კომენტარი, არ შეესაბამება რეალობას.