„ყველამ გაიმარჯვა, მათ შორის ირანმა. მათ ქვეყანა და ნავთობი შეინარჩუნეს“-ტრამპი

აშშ-ის პრეზიდენტმა, დონალდ ტრამპმა ნატოს გენერალურ მდივანთან, მარკ რუტესთან შეხვედრის დროს განაცხადა, რომ ირან-ისრაელის ომში ყველა მხარემ გაიმარჯვა, მათ შორის ირანმაც.

„ეს იყო უზარმაზარი გამარჯვება ყველასთვის, მათ შორის ირანისთვის, რომელმაც შეინარჩუნა ქვეყანა და ნავთობი. მათ ჰყავთ ძალიან ჭკვიანი ხალხი. ისრაელი ძალიან დაზარალდა, განსაკუთრებით გასული რამდენიმე დღე ისრაელისთვის ძალიან მძიმე იყო, იმიტომ რომ ბალისტიკურმა რაკეტებმა ბევრი შენობა გაანადგურა“, – თქვა ტრამპმა.

თეთრი სახლის ლიდერმა აგრეთვე დასძინა, რომ ისრაელის პრემიერ-მინისტრი, ბენიამინ ნეთანიაჰუ საკუთარი თავით უნდა ამაყობდეს.