ღობე, რომელზეც დღეს ყაველაშვილი საუბრობდა დიდი გულისტკივილით და მოთქმით, უცებ ჩამოვარდა, უცებ მოხდა მისი მოხსნა – რაღაცნაირად სატყუარას ჰგავდა, – ამის შესახებ „მართლმსაჯულების სახლის“ დამფუძნებელმა, იურისტმა ეკა ბესელიამ 4 ოქტომბერს ორბელიანების სასახლესთან განვითარებულ მოვლენებზე საუბრისას „პალიტრანიუსის” ეთერში განაცხადა.
მისი თქმით, საჭიროა ექსპერტიზა და ასევე, კარგად შესწავლა იმისა, რატომ იყო ორბელიანების სასახლის შიდა ეზოში მხოლოდ რამდენიმე ადამიანი.
„ორბელიანების სასახლის ეზოში იყო მხოლოდ დაცვა, არ იდგა არავინ დამატებითი ძალების სახით. ძალიან დიდი აქციაა ახლოს, ქუჩაში გამოსულია ასი ათასი ადამიანი და ამ დროს ყველა ახლომდებარე სახელმწიფო დაწესებულება, როგორც წესი, დაცული უნდა იყოს. სივრცეში, სადაც ადამიანები შევიდნენ, ჩანდა, რომ იყო მხოლოდ შიდა დაცვის სამსახური. ღობე, რომელზეც დღეს ყაველაშვილი საუბრობდა დიდი გულისტკივილით და მოთქმით, უცებ ჩამოვარდა, უცებ მოხდა მისი მოხსნა. ბევრმა იცის, სასახლეს როგორი მყარი გალავანი აქვს, ასე იოლად ის არ ირღვევა. ბევრი ადამიანი არ იყო შიგნით შესული. რაღაცნაირად სატყუარას ჰგავდა. შთაბეჭდილება რჩებოდა, რომ ხელოვნურად იყო დატოვებული ღობის იმიტაცია. საჭიროა ექსპერტიზა, კარგად შესწავლა, როგორი იყო გარე პერიმეტრი, რატომ იყო შიდა ეზოში მხოლოდ რამდენიმე ადამიანი, რომელიც არ იყო არც საპატრულო პოლიცია და არც სპეცრაზმის წარმომადგენელი, იყო სახელმწიფო დაცვა. ისე ჩანდა, თითქოს პროვოცირება გაუკეთეს, რომ შიგნით შესულიყვნენ ადამიანები და დაფიქსირებულიყო, რომ ეს იყო სასახლეში შეჭრა.
მე საერთოდ ვერ გავიგე, რატომ წავიდნენ, რა შუაში იყო პრეზიდენტის სასახლე. მართალი გითხრათ, ლოგიკა ვერ დავინახე აქ. ის არის ერთ-ერთი ყველაზე ბუტაფორიული შინაარსის მატარებელი შენობა და მისი დღევანდელი -პოლიტიკური დატვირთვა როგორ შეიძლება აღიქვა, რომ ეს არის სტრატეგიულად მნიშვნელოვანი“, – განაცხადა ეკა ბესელიამ.
