პარიზის ოლიმპიადა ხვალ ოფიციალურად იხსნება. სულ მალე, საფრანგეთის მიმართულებით ქართველ სპორტსმენთა ნაწილი – მოცურავეები და ძალოსნები გაემგზავრებიან. “კურიერი” აეროპორტში იმყოფება და სპორტსმენებს პირდაპირ ეთერში გაესაუბრა.
სპორტსმენები პოზიტიურად არიან განწყობილები და აქვთ მოლოდინი, რომ წელს, წინა ოლიმპიადასთან შედარებით, უკეთესი შედეგები დაიდება.
შოთა მიშველიძე, საქართველოს ეროვნული ნაკრების ძალოსანი: “მინდა ყველა გამომსვლელს, სპორტსმენს ვუსურვო წარმატება რაც შეიძლება მეტი მედლებით, რაც შეიძლება მეტი გამარჯვებებით და მეტი საქართველოს ჰიმნით. რაც შეეხება ჩვენს შესაძლებლობებს – ამ ეტაპზე, არის რაღაც პატარა ხარვეზები, რის აღმოფხვრასაც ვცდილობთ გუნდის მთელი შემადგენლობა. შეჯიბრამდე ჯერ კიდევ არის დრო და ვნახოთ რა იქნება.”
გიორგი ასანიძე, საქართველოს ძალოსანთა ეროვნული ნაკრების მთავარი მწვრთნელი: “იმედი მაქვს, რომ მიუხედავად თავისი სირთულისა, ეს ოლიმპიადა იქნება უფრო წარმატებული. ასე გვჯერა გამომდინარე იქიდან, რომ ძალიან მაღალი ხარისხის გუნდია. რაც შეეხება ძალოსნებს – ჩვენ არ დავარღვევთ ტრადიციას – ჯერ, რაც მთავარია, ოქრო, და შემდეგ, როგორც წინა ოლიმპიადაზე, თუ გავალამაზებთ სხვადასხვა მედლებით, ეს ჩვენთვის დამატებითი მოტივაცია იქნება.”
ლერი ხაბელოვი, საქართველოს ეროვნული ოლიმპიური კომიტეტის პრეზიდენტი: “განწყობა გვაქვს საბრძოლო და იმედიანად ვართ, რამეთუ ვიცით, რომ ჩვენს გუნდში 4 ოლიმპიური ჩემპიონია, ასევე, მსოფლიოს, ევროპის ჩემპიონები. ამიტომ, ეს განწყობა საზოგადოებასაც აქვს. მთავარია, შევხვდებით ოლიმპიურ თამაშებს იმ განწყობით, რა განწყობაც ჰქონდათ წინა შეჯიბრებებში და ვფიქრობ, რომ შედეგი უკეთესი უნდა იყოს, ვიდრე იყო.”
საქართველო პარიზის 2024 წლის ოლიმპიადაზე 10 სპორტის სახეობაში 28 სპორტსმენით წარდგება. პირველები, საქართველოს სახელით ოლიმპიადაზე მოფარიკავე სანდრო ბაზაზე და ძიუდოისტი გიორგი სარდალაშვილი გამოვლენ, რომლებიც უკვე 27 ივლისს, დღის პირველ ნახევარში, დილის ბლოკში იასპარეზებენ.
მასალის გამოყენების პირობები
