ტრამპმა უკრაინის დახმარება ბიზნესად აქცია – გერმანული მედია

თუ დონალდ ტრამპი უკრაინას Patriot-ის საჰაერო თავდაცვის სისტემებს მიაწვდის, რის საფასურსაც ევროპელი მოკავშირეები გადაიხდიან, მაშინ ევროპელები აშშ-ის ვასალები გახდებიან, – წერს გაზეთ Tageszeitung-ის მიმომხილველი, ერიკ ბონზე.

ის ხაზს უსვამს იმას, რომ რაც კარგია კიევისთვის, შესაძლოა საბედისწერო აღმოჩნდეს ბრიუსელისთვის.

ბონზეს აზრით, „ყველაზე დიდი ეკონომიკური საფრთხე ამჟამად პუტინისგან კი არა, ტრამპისგან მოდის, რომელიც მთელ მსოფლიოს თავისი სავაჭრო ომით ემუქრება“.

„ტრამპი უკრაინის დახმარებას ბიზნესად აქცევს“ – ასეთი სათაურით გამოვიდა კომენტარი Tagesschau-ს ვებგვერდზე.

„როდესაც სამნახევარი წლის წინ რუსეთი უკრაინაში შეიჭრა, აშშ-მა გაბედული დაპირება დადო: ისინი დაეხმარებოდნენ თავდასხმის ქვეშ მყოფ ქვეყანას მანამ, სანამ საჭირო იქნებოდა. […] დღეს ეს წარსულის ზღაპარს ჰგავს“, – წერს სტატიის ავტორი, ფლორიან კელერმანი.

მისი აზრით, საუბარი არ არის დახმარებაზე, არამედ საქმიან ურთიერთობებზე და უკრაინა „მუდმივად უნდა ეცადოს, რომ თეთრ სახლში უფროსისთვის საინტერესო დარჩეს“.