CBS-ის ცნობით, დონალდ ტრამპი კერძო სექტორის მიერ განვითარებულ AI-ში 500 მილიარდი დოლარის ინვესტირებას გეგმავს.
გავრცელებული ინფორმაციით, ეს მოიცავს ChatGPT-ის შემქმნელ OpenAI-ს, იაპონურ საინვესტიციო ჯგუფს SoftBank-სა და პროგრამული უზრუნველყოფის გიგანტს Oracle-ს. სწორედ ამ კომპანიების მონაცემთა ცენტებში შეიძლება ჩაიდოს სახელმწიფოს მიერ გამოყოფილი მილიარდები. მოხსენების თანახმად, ამ ცენტრის პირველი ობიექტი ტეხასში აშენდება.
მედიის თანახმად, პროექტს Stargate (ვარსკვლავური კარიბჭე) ერქმევა. სავარაუდოა, რომ სახელმწიფოს გარდა პროექტს სხვა ინვესტორებიც ეყოლება.
CBS-ის ინფორმაციით, პროექტის პირველადი შენატანი 100 მილიარდი იქნება. შემდეგ ოთხ წელიწადში ეს თანხა 500 მილიარდ დოლარამდე გაიზრდება.
ეს ყველაფერი ხდება მას შემდეგ, რაც ტრამპმა ბაიდენის ადმინისტრაციის მიერ ხელოვნურ ინტელექტთან დაკავშირებული რეგულაციები გააუქმა. და, აი, ახლა ტრამპი კერძო სექტორს ხელოვნური ინტელექტის განვითარებისთვის მწვანე შუქს უნთებს.
SoftBank-ისა და OpenAI-ის აღმასრულებლებმა უარი თქვეს ამ გარიგებაზე კომენტარის გაკეთებაზე. ამის პარალელურად, OpenAI-ის აღმასრულებელი დირექტორი სემ ალტმანი ტრამპის ინაუგურაციას დაესწრო და შესაბამის ფონდს ფულიც შესწირა. ამასთან, Oracle-ის აღმასრულებელი დირექტორი ლარი ელისონი ტრამპის დიდი ხნის მოკავშირე და დონორია. რაც შეეხება Softbank-ის აღმასრულებელ დირექტორსა და მილიარდერ მასაიოში სონის, ის ასევე ტრამპის მოკავშირედ ითვლება.
ტრამპმა ჯერ კიდევ დეკემბერში განაცხადა, რომ SoftBank ხელოვნური ინტელექტის მიმართულებით 100 მილიარდი დოლარის ინვესტირებას განახორციელებს. დიდი ალბათობით, ეს განცხადება Stargate-თან არის დაკავშირებული.
ამის ფონზე, საყურადღებოა სემ ალტმანის ბოლო სიტყვები, რომლის მიხედვითაც, OpenAI-ში იციან, თუ როგორ შექმნან ხელოვნური ზოგადი ინტელექტი. სულ რამდენიმე დღის წინ OpenAI-ის აღმასრულებელმა დირექტორმა აღნიშნა, რომ ხელოვნური ზოგადი ინტელექტის (AGI) ეპოქა ახლოს არის. მისი თქმით, მან და მისმა კოლეგებმა იციან, თუ როგორ უნდა მივიდნენ აქამდე.
როგორც ჩანს, ალტმანის სიტყვების უკან მომავლის ინვესტიციებიცაა, მათ შორის ზემოთ ხსენებული 500 მილიარდი დოლარი.
მასალის გამოყენების პირობები
