საქართველოს საპატრიარქო მარნეულისა და ჰუჯაბის ეპისკოპოს გიორგისთან (ჯამდელიანი) დაკავშირებულ საქმეზე სრულიად საქართველოს კათოლიკოს-პატრიარქის ილია II-ს ბრძანებას აქვეყნებს.
„საქართველოს საპატრიარქოს გაფართოებული სინოდალური კომისიის ა.წ. 19 ივნისის დასკვნის საფუძველზე, მარნეულისა და ჰუჯაბის ეპისკოპოს გიორგისთან (ჯამდელიანი) დაკავშირებული საქმის სხვა მასალების გარკვევამდე, შეჩერდეს აღნიშნული ეპარქიის საეპისკოპოსო სასამართლოს მიერ ა.წ. 6 ივნისს გამოტანილი განაჩენი“, – ნათქვამია ბრძანებაში.
ცნობისთვის, სინოდალურმა კომისიამ შუამდგომლობით მიმართა ილია II-ს, რომ საქმესთან დაკავშირებულ სხვა დეტალებში გარკვევამდე, მარნეულისა და ჰუჯაბის ეპარქიის საეპისკოპოსო სასამართლოს მიერ მიმდინარე წლის 6 ივნისს გამოტანილი განაჩენი შეჩერდეს.
კერძოდ, როგორც ცნობილია 6 ივნისს გაიმართა მარნეულისა და ჰუჯაბის საეპისკოპოსო სასამართლო, რომელზეც „მარნეულისა და ჰუჯაბის ეპისკოპოსის წინააღმდეგ მკვლელობის მცდელობისა და შეთქმულების გამო გ.შ.-ს გულწრფელ სინანულამდე წმინდა და საღვთო ზიარების მიღება აეკრძალა“.
