უცხოელი ტურისტები, რომლებიც ინდონეზიის კურორტ ბალის ესტუმრებიან 150,000 ინდონეზიურ რუპიას, ანუ, დაახლოებით, 10 დოლარს გადაიხდიან. ანალოგიური ტურისტული გადასახადი ამოქმედდა ბალის მეზობელ პატარა კუნძულებზე, ნუსა-პენიდაზე, ნუსა-ლემბონგანსა და ნუსა-ჩენინგანზე.
ამასთან, გადასახადი უნდა გადაიხადონ იმ ტურისტებმაც, რომლებიც ბალიზე ინდონეზიის სხვა ნაწილებიდან შიდა ავიარეისებით ან ბორნით ჩადიან. საფასური მოგზაურთა ყველა ასაკობრივ კატეგორიაზე, მათ შორის, ბავშვებზეც ვრცელდება.
გამონაკლისი მხოლოდ რამდენიმე სავიზო კატეგორიას ეხება. მათ შორის არის დიპლომატიური, ასევე, ოფიციალური დელეგაციების წარმომადგენლები, ეკიპაჟის წევრები, დროებითი ან მუდმივი ბინადრობის ნებართვის მქონე პირები. გარდა ამისა, გადასახადს არ გადაიხდიან ბალიში ოჯახის შექმნის, „ოქროს,“ სტუდენტური და ბიზნესვიზების მქონე პირები. ყველა ჩამოთვლილი კატეგორიის მგზავრებმა გადასახადისგან გათავისუფლების შესახებ ონლაინ განაცხადი ბალიში გამგზავრებამდე, წინასწარ უნდა წარადგინონ.
ტურისტული გადასახადისგან, ასევე, თავისუფლდებიან ინდონეზიის მოქალაქეები და სამხრეთ-აღმოსავლეთ აზიის ქვეყნების ასოციაცია, რომელშიც, ინდონეზიის გარდა, შედის ბრუნეი, ვიეტნამი, კამბოჯა, ლაოსი, მალაიზია, მიანმარი, სინგაპური, ტაილანდი და ფილიპინები.
საფასურის გადახდა ჩასვლის ადგილზე, კერძოდ, ნგურახა რაის სახელობის საერთაშორისო აეროპორტში ან ბენოას პორტში არის შესაძლებელი. თუმცა ინდონეზიის ხელისუფლება სტუმრებს ურჩევს, გადასახადი წინასწარ, პორტალ Love Bali-ის მეშვეობით გადაიხადონ. გადახდისთვის MasterCard-ის, Visa American Express-ისა და JCB-ის ბარათები გამოიყენება.
გადახდის შემდეგ სტუმარმა QR-კოდის მქონე ქვითარი მთელი მოგზაურობის განმავლობაში უნდა შეინახოს და როგორც საზღვარზე, ასევე, სპეციალური ტურისტული პატრულის მოთხოვნის საფუძველზე უნდა წარადგინოს.
მთავრობა აცხადებს, რომ გადასახადს ტურისტული სერვისების გასაუმჯობესებლად და ადგილობრივი კულტურის შესანარჩუნებლად გამოიყენებს. მოსაკრებელი, ასევე, მიმართული იქნება დანაგვიანებასთან საბრძოლველად, რომელიც კორონავირუსული პანდემიის შემდეგ გაუარესდა, როცა ბალის ტურისტები მიაწყდნენ.
ბალიზე ჩასული ტურისტების რაოდენობის გათვალისწინებით, ხელისუფლება ახალი გადასახადიდან ყოველდღიურად, დაახლოებით, 180 ათას დოლარს მიიღებს. 2023 წელს ბალის, დაახლოებით, 11 მილიონი უცხოელი ტურისტი ეწვია, რამაც საწყის მიზანს 2,5 მილიონი მოგზაურით გადააჭარბა. წელს ხელისუფლება ტურისტული ნაკადის 14 მილიონ ადამიანამდე ზრდას პროგნოზირებს.
მასალის გამოყენების პირობები
