უკრაინის შეიარაღებულმა ძალებმა კიდევ ერთი მასშტაბური დრონული იერიში განახორციელეს რუსეთის სიღრმეში — ამჯერად სამიზნე სარატოვის ოლქი აღმოჩნდა, სადაც ნავთობგადამამუშავებელ ქარხანასთან ერთად, რუსეთის ერთ-ერთი უმსხვილესი ელექტრონული კომერციის პლატფორმის, Ozon-ის ლოგისტიკური ინფრასტრუქტურაც დაზარალდა.
ღამის საათებში, დაახლოებით 02:00 საათზე, სარატოვის ოლქის გუბერნატორმა რომან ბუსარგინმა მოსახლეობას საფრთხის შესახებ გააფრთხილა. მისი განცხადებით, ადგილობრივი განგაშის სისტემები შეიძლებოდა ჩართულიყო, ხოლო ყველა საგანგებო სამსახური სრულ მზადყოფნაში იყო გადაყვანილი.
Telegram-ის სხვადასხვა არხმა ხანძრის ინფორმაცია გაავრცელა — კერძოდ, Ozon-ის ლოგისტიკური ჰაბი ცეცხლს გაჰყოლია. ასევე ცნობილი გახდა, რომ ოლქის ქალაქ ენგელსში მოსახლეობამ აფეთქებების ხმა გაიგონა.
Ozon-მა მოგვიანებით ოფიციალური განცხადება გაავრცელა, რომელშიც დადასტურდა, რომ სარატოვში კომპანიის ლოგისტიკურ ცენტრსა და მიწოდების პუნქტზე უპილოტო საფრენი აპარატებმა იერიში მიიტანეს. კომპანიის ცნობით, პირველადი მონაცემებით, ადამიანური მსხვერპლი არ ყოფილა — თანამშრომლები ოპერატიულად გამოიყვანეს შენობიდან. ხანძრის ლიკვიდაციაზე საგანგებო სამსახურები მუშაობდნენ.
აღსანიშნავია, რომ სარატოვის ოლქი, განსაკუთრებით ქალაქი ენგელსი, სადაც რუსეთის სტრატეგიული ბომბდამშენების ბაზა მდებარეობს, ომის დაწყებიდან მოყოლებული უკრაინული დრონების ყურადღების ცენტრშია. ამჯერადი თავდასხმა კი, ტრადიციული სამხედრო ობიექტებისგან განსხვავებით, კომერციული ინფრასტრუქტურის ნგრევასაც ისახავდა მიზნად — რაც სტრატეგიული ზეწოლის ახალ განზომილებაზე მიანიშნებს.
Sheni Ambebi News
წყარო: on.ge
