სკოლის დამამთავრებელი ატესტატების გაცემა მიმდინარე წლის 23 ივნისიდან დაიწყება. აღნიშნული ინფორმაცია სახელმწიფო სერვისების განვითარების სააგენტომ გაავრცელა.
სრული ზოგადი განათლების დამადასტურებელი დოკუმენტის მიღება შესაძლებელი იქნება როგორც იუსტიციის სახლის ფილიალებში, ისე სახელმწიფო სერვისების განვითარების სააგენტოს ტერიტორიულ სამსახურებში.
ატესტატის მისაღებად აუცილებელია პირადობის დამადასტურებელი დოკუმენტის წარდგენა. განაცხადის შეტანა დამოუკიდებლად შეუძლიათ 17 წელს მიღწეულ პირებსაც.
იმ შემთხვევაში, თუ კურსდამთავრებულს შეცვლილი აქვს სახელი ან გვარი, საჭირო იქნება შესაბამისი დამადასტურებელი დოკუმენტის წარმოდგენაც.
ატესტატის გაცემის ვადები და მომსახურების საფასური შემდეგნაირია:
- მე-10 სამუშაო დღეს – უფასოდ;
- მე-5 სამუშაო დღეს – 25 ლარი;
- მე-3 სამუშაო დღეს – 40 ლარი;
- მე-2 სამუშაო დღეს – 55 ლარი;
- განცხადების შეტანის დღესვე – 65 ლარი.
დოკუმენტის დაჩქარებული წესით მიღების მსურველებს შეუძლიათ სასურველი მომსახურების ვადა განაცხადის წარდგენისას შეარჩიონ.
