პროკურორის შეკითხვა ბრალდებულებს — რატომ არ გააფრთხილეს ნარკოტიკის სხვა მომხმარებლები
დაურ ბუავას გარდაცვალების საქმეზე მიმდინარე სასამართლო განხილვისას პროკურორმა დავით ყაზარაშვილმა ნარკოტიკულ დანაშაულში ბრალდებულ საბა ბოჭორიშვილსა და გივი გუდაძეს ჰკითხა, რატომ არ დაუკავშირდნენ იმ პირებს, რომლებთანაც, გამოძიების ვერსიით, მათ ნარკოტიკული საშუალება გააზიარეს, მას შემდეგ, რაც თავად მისი მოხმარების შედეგად ჯანმრთელობის გაუარესება დაეწყოთ.
ბრალდებულებმა პროკურორის კითხვაზე პასუხი არ გასცეს.
სასამართლო სხდომაზე ასევე გაირკვა, რომ ორივე ბრალდებული პირობითი მსჯავრის ქვეშ იმყოფება. პროკურორის ინფორმაციით, ნარკოტიკული საშუალების მიღების შემდეგ საბა ბოჭორიშვილს სამედიცინო დაწესებულებაში გადაყვანა დასჭირდა, ხოლო გივი გუდაძეს გულყრა განუვითარდა.
ყაზარაშვილმა ყურადღება გაამახვილა იმ გარემოებაზე, რომ, მისი შეფასებით, ბრალდებულებს შეეძლოთ დაკავშირებოდნენ იმ ადამიანებს, რომლებსაც ნარკოტიკული საშუალება გადასცეს და შესაძლო საფრთხის შესახებ გაეფრთხილებინათ.
პროკურორის განცხადებით, განსაკუთრებით საყურადღებოა ეს გარემოება იმის გათვალისწინებით, რომ თავად ბრალდებულებს ნარკოტიკული საშუალების მიღების შემდეგ ჯანმრთელობის პრობლემები შეექმნათ.
საქმის მასალების მიხედვით, გამოძიება გივი გუდაძეს უკავშირებს იმ ნარკოტიკული საშუალების გადაცემას, რომელიც მოგვიანებით დაურ ბუავამ და ვალერია კირილიუკმა მოიხმარეს. გამოძიების ვერსიით, საუბარია მეთადონზე.
სამართალდამცავებმა გუდაძის საცხოვრებლის ჩხრეკისას, გამოძიების ინფორმაციით, 6,27 გრამი მეთადონი აღმოაჩინეს. საგამოძიებო უწყების ცნობით, ნივთიერება ცხრა ცალკეულ პაკეტად იყო გადანაწილებული, რასაც გამოძიება მისი რეალიზაციის ხელშეწყობის მიზანს უკავშირებს.
საქმის კიდევ ერთი ბრალდებული, საბა ბოჭორიშვილი, გამოძიების თანახმად, უკანონოდ ფლობდა 0,24 გრამ გამომშრალ მარიხუანას, რომელიც მის საცხოვრებელ სახლში იქნა აღმოჩენილი.
გივი გუდაძეს ბრალი წარდგენილი აქვს საქართველოს სისხლის სამართლის კოდექსის შესაბამისი მუხლებით, რომლებიც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას, რეალიზაციის ხელშეწყობასა და ნარკოტიკული საშუალების უკანონო გადაცემას ეხება. აღნიშნული დანაშაულებისთვის კანონმდებლობა მძიმე სასჯელს, მათ შორის ხანგრძლივ ან უვადო თავისუფლების აღკვეთას ითვალისწინებს.
საბა ბოჭორიშვილს კი ბრალი წარდგენილი აქვს ნარკოტიკული დანაშაულისთვის ნასამართლევი პირის მიერ მცირე ოდენობით ნარკოტიკული საშუალების უკანონო შეძენა-შენახვის ფაქტზე. აღნიშნული ქმედებისთვის კანონით გათვალისწინებულია თავისუფლების აღკვეთა ერთ წლამდე ვადით.
დაურ ბუავას გარდაცვალების საქმეზე სასამართლო განხილვა გრძელდება. ბრალდების მხარის მიერ წარმოდგენილი გარემოებები ამ ეტაპზე წარმოადგენს გამოძიებისა და სასამართლო განხილვის საგანს, ხოლო ბრალდებულთა ბრალეულობა საბოლოოდ სასამართლოს კანონიერ ძალაში შესული გადაწყვეტილებით უნდა დადგინდეს.
