ძნელია ჩემთვის ამ წუთებში გამოვხატო თქვენ წინაშე ჩემი სულიერი განწყობა, პირველი განცდა, რაც თან ახლავს იმ არჩევანს, რომელმაც წილად მარგუნა დიდი პატივიც და მძიმე ჯვარიც, – განაცხადა სამების ტაძარში ახლად არჩეულმა სრულიად სრულიად საქართველოს კათოლიკოს-პატრიარქმა, შიო მესამემ.
მან მადლობა შესწირა ღმერთს ამ დიდი წყალობისთვის. ასევე მადლობა გადაუხადა ყოვლადწმინდა ღვთისმშობელს, მართლმადიდებელი ეკლესიის წმინდანთა დასს, ღირსს მამა შიო მღვიმელს, სენაკისა და ჩხოროწყუს ეპარქიის მამებს, წმინდა ალექსი შუშანიას და სხვა წმინდანებს შემწეობისთვის.
„მადლობა მართლმადიდებელი ეკლესიის წმინდა სინოდის მღვდელმთავრებს ჩემდამი გამოჩენილი ესოდენ დიდი ნდობისთვის. თითოეულ ადამიანს, ვინც იღვაწა დღევანდელი დღის ღირსეულად წარმართვისთვის, კრების ყველა დელეგატსა და სტუმარს.
განსაკუთრებული მადლობა ქართველ ხალხს სიყვარულისთვის, ლოცვისა და თანადგომისთვის. ასევე მინდა, მადლობა გადავუხადო სენაკისა და ჩხოროწყუს ეპარქიის სამღვდელოებას გამოვლენილი ნდობისთვის და მათთან ერთად ღვთისა და ერის სამსახურში გატარებული წლებისთვის.
დიდი მადლია და წყალობა ღვთისა და ამავდროულად, მძიმეა მწყემსმთავრობის ჯვარი და პასუხისმგებლობა. შეუძლებელია უფლის განგებულების და განზრახვის გამოცნობა“, – აღნიშნა უწმინდესმა და უნეტარესმა შიო მესამემ.
საქართველოს კათოლიკოს – პატრიარქი შიო მესამე მღვდელმთავრებმა 22 ხმით არჩიეს.
