პანამის პრეზიდენტი ხოსე რაულ მულინო აცხადებს, რომ პანამის არხი იყო და დარჩება პანამის. ამის შესახებ ნათქვამია პანამის პრეზიდენტის მიერ გავრცელებულ განცხადებაში, რომელიც მან „პანამის რესპუბლიკისა და მისი ხალხის სახელით“ გაავრცელა.
„არხი არის და დარჩება პანამის, მისი ადმინისტრირება დარჩება პანამის კონტროლის ქვეშ მისი მუდმივი ნეიტარალიტეტის პატივისცემით“, – ნათქვამია მულინოს განცხადებაში.
პანამის არხზე კონტროლის აღდგენის შესახებ დონალდ ტრამპმა თავის საინაუგურაციო სიტყვაში ისაუბრა.
„ჩინეთი ახორციელებს პანამის არხის ოპერირებას და ჩვენ ის ჩინეთისთვის არ გადაგვიცია, ჩვენ ის გადავეცით პანამას და ჩვენ მას უკან დავიბრუნებთ“, – განაცხადა დონალდ ტრამპმა.
პანამის პრეზიდენტის განცხადებით, მსოფლიოში არცერთი ქვეყანა არ ერევა პანამის ადმინისტრაციაში. ის ასევე შეეწინააღმდეგა იდეას, რომ აშშ-მა არხი პანამას გადასცა.
„არხი არ ყოფილა ვინმეს დათმობა. ეს იყო თაობების ბრძოლის შედეგი, რომლის კულმინაცია გახდა 1999 წელს ტორიხო-კარტერის ხელშეკრულების ნაყოფი. მას შემდეგ დღემდე, 25 წლის განმავლობაში ჩვენ ვმართავდით და ვაფართოებდით მას შეუფერხებლად პასუხისმგებლობით, რათა გვემსახურა მსოფლიოსთვის და გლობალური ვაჭრობისთვის, მათ შორის აშშ-ისთვის“, – აღნიშნა პანამის პრეზიდენტმა.
პანამის ლიდერის თქმით, დიალოგი ყოველთვის არის აღიშნული საკითხების გარკვევის შესაძლებლობა პანამის უფლებების, სუვერენიტეტისა და არხის საკუთრების შელახვის გარეშე.
პანამის ტერიტორიაზე მდებარე არხი ერთმანეთთან აკავშირებს წყნარ და ატლანტის ოკეანეებს. ამერიკის შეერთებულმა შტატებმა 82 კილომეტრის სიგრძის პანამის არხი 1900-იანი წლების დასაწყისში ააგო კომერციული და სამხედრო გემების ტრანზიტის გასაადვილებლად. 1999 წლის 31 დეკემბერს კონტროლი პანამის არხზე პანამას გადაეცა პრეზიდენტ ჯიმი კარტერის მიერ 1977 წელს ხელმოწერილი ხელშეკრულების საფუძველზე.
მასალის გამოყენების პირობები
