ნიუ მექსიკოს პროკურორმა ამერიკელ მსახიობ ალეკ ბოლდუინის წინააღმდეგ აღძრული სისხლის სამართლის საქმე შეწყვიტა, რომელიც 2021 წლის 22 ოქტომბერს, ქალაქ სანტა-ფეში, ვესტერნ Rust-ის გადასაღებ მოედანზე მომხდარ უბედურ შემთხვევას ეხებოდა.
პროკურორმა კარი მორისეიმ ბოლდუინის წინააღმდეგ შეტანილი საჩივარი მოხსნა.
ბოლდუინის ადვოკატებმა, ლუკ ნიკასმა და ალექს სპირომ განაცხადეს, რომ “დღევანდელი გადაწყვეტილება, გაწვეულ იქნეს საჩივარი, გამართლებაა იმისა, რასაც ალეკ ბოლდუინი და მისი ადვოკატები დასაწყისშივე ამბობდნენ – ეს იყო ენით გამოუთქმელი ტრაგედია, თუმცა ალეკ ბოლდუინს დანაშაული არ ჩაუდენია”.
ცნობისთვის, ნიუ-მექსიკოს სასამართლომ ალეკ ბოლდუინის წინააღმდეგ აღძრულ საქმეზე გამამართლებელი განაჩენი 2024 წლის ივლისში გამოიტანა და ამერიკელი მსახიობი უდანაშაულოდ ცნო.
ალეკ ბოლდუინს ნიუ-მექსიკოს სასამართლო 2021 წლის 22 ოქტომბერს, ქალაქ სანტა-ფეში, ვესტერნ Rust-ის გადასაღებ მოედანზე მომხდარ უბედურ შემთხვევაში სდებდა ბრალს. მსახიობის მიერ გასროლილ იარაღს, 42 წლის ოპერატორის, ჰალინა ჰატჩინსის სიცოცხლე შეეწირა.
დაჭრილი ჰალინა ჰატჩინსი საავადმყოფოში ვერტმფრენით გაამგზავრეს, ოპერატორი საავადმყოფოში მისვლამდე გარდაიცვალა – ის 42 წლის იყო.
საბრძოლო ამუნიციაზე და იარაღზე პასუხისმგებელი იარაღის ოსტატი, ჰანა გუტიერეს-რიდი იყო. ხოლო თავად იარაღი, რომელიც ფუჭი ვაზნებით უნდა ყოფილიყო დატენილი, ბოლდუინს რეჟისორის თანაშემწემ, დეივ ჰოლსმა გადასცა და უთხრა, რომ უსაფრთხოა – რეალურად მჭიდში საბრძოლო ვაზნები იდო, ამის შესახებ სასამართლოს მასალებში წერია.
2022 წლის აპრილში ნიუ-მექსიკოს შტატმა Rust-ის პროდიუსერებს $136 793-ის ოდენობის ჯარიმა დააკისრა.
