ნიდერლანდების ოფიციალური მონაცემებით, 2024 წელს მიღებული კანონის ამოქმედების შემდეგ ქვეყანაში პირველი ევთანაზიის შემთხვევა 1 წლის ასაკის ბავშვს შეეხო. ეს კანონი 12 წლამდე ასაკის განუკურნებელი დაავადების მქონე ბავშვებისთვის ევთანაზიის შესაძლებლობას ითვალისწინებს.
ბავშვი ორსულობის 26-ე კვირაზე დაიბადა — გაცილებით ნაადრევად, ვიდრე ეს ნორმალურ სიტუაციაში ხდება. მშობიარობის შემდეგ მას მძიმე გართულებები განუვითარდა: თავის ტვინის დაზიანება და განმეორებითი ინფექციები. 4 თვის ასაკში ბავშვს სეფსისი დაემართა, 8 თვისთვის კი მედიცინამ მას ორი სერიოზული დიაგნოზი — ვესტის სინდრომი (ინფანტილური სპაზმები) და ცერებრული დამბლა — დაუდასტურა.
სამედიცინო ჩანაწერების თანახმად, ბავშვის სიცოცხლის მანძილზე მდგომარეობა არ გაუმჯობესებულა. ექიმებმა და მშობლებმა ერთობლივად შეაფასეს, რომ ბავშვი გაუსაძლის ტანჯვაში იმყოფებოდა, ხოლო გამოჯანმრთელების რაიმე შანსი პრაქტიკულად გამორიცხული იყო. ყველა სახის სამედიცინო ჩარევა და მოვლა, არარეზულტატური დარჩა. სწორედ ამ გარემოებებმა განაპირობა ის, რომ მშობლებმა ბავშვის სიცოცხლის მოწყალებით დასრულება სთხოვეს მკურნალ ექიმს.
ნიდერლანდები ევთანაზიის კუთხით მსოფლიოში ერთ-ერთი ყველაზე ლიბერალური სამართლებრივი ჩარჩოს მქონე ქვეყანაა. 2002 წელს ზრდასრულთათვის ნებაყოფლობითი ევთანაზია ლეგალიზდა. 2024 წელს კი კანონში შეტანილი ცვლილებით ეს უფლება 12 წლამდე ასაკის ბავშვებზეც გავრცელდა, თუმცა მხოლოდ კონკრეტული პირობების დაცვით — ბავშვს უნდა ჰქონდეს განუკურნებელი დაავადება, განიცდიდეს მძიმე ტანჯვას და გაუმჯობესების პერსპექტივა სრულად გამორიცხული უნდა იყოს.
კანონმდებლობის მიხედვით, 12-15 წლის ბავშვების შემთხვევაში სავალდებულოა მშობლის ან კანონიერი მეურვის თანხმობა. 16-17 წლის მოზარდებს კი კონსულტაციის გავლა ევალებათ, თუმცა მშობლის პირდაპირი თანხმობა მათ შემთხვევაში აუცილებელი არ არის. 12 წლამდე ასაკის ბავშვებისთვის გადაწყვეტილებას ექიმი და მშობლები ერთობლივად იღებენ.
Sheni Ambebi News
წყარო: on.ge
QR კოდი
სტატიის ციტირება
შენი ამბები. (2026). ნიდერლანდებში 1 წლის ბავშვი გახდა პირველი, ვინც 2024 წლის კანონის საფუძველზე ევთანაზიით გარდაიცვალა. 29 სექტემბერი, 2026. https://sheniekimi.ge/ambebi/ნიდერლანდებში-1-წლის-ბავშ/
