ქართველი მსახიობი და პოეტი, ნიკო გომელაური დღეს, 12 ივლისს 50 წლის გახდებოდა. ჟურნალისტი თეონა გოგნიაშვილი ამ დღესთან დაკავშირებით სოციალურ ქსელში ემოციურ პოსტს აქვეყნებს.
ჟურნალისტი იხსენებს ნიკოს გაცნობას და ჰყვება, როგორ ჩაწერა მასთან ინტერვიუ.
თეონა გოგნიაშვილი წერს, რომ ნიკო გომელაური, ქართული სცენის რობინ ჰუდი იყო:
„მას მხოლოდ ერთხელ შევხვდი… 
ეს იყო 2001 წელს, რადიოს მეათე სტუდიაში. ზუსტად დათქმულ დროს მოვიდა, სახეზე დაეტყო, რომ ახალგაზრდა ჟურნალისტისგან მაინცდამაინც საინტერესო კითხვებს არ ელოდა. ამიტომ ყოველი შემთხვევისთვის, ჩაილაპარაკა – უკაცრავად, მალე უნდა გავიდე, თეატრში რეპეტიცია მაქვსო. ამ შეხვედრაზე ნაფიქრი მქონდა და კითხვები წინასწარ არ ჩამომიწერია, სპონტანურად, რაც თავში გამიჩნდა, ყველაფერი ვკითხე… ჰოდა, დაიწყო… სტუდიაში ისეთი ცეცხლი დაანთო, ისეთი შარმი ჰქონდა, კინაღამ დამავიწყდა, რომ ჩაწერაზე ვიყავით.
„აზრზე“ მაშინ მოვედი, როდესაც სტუდიის მინის ფანჯრის მიღმა ხმის რეჟისორისა და ოპერატორი გოგოების ატკარცალებული სახეები დავინახე. თითქმის ყველაფერზე ვისაუბრეთ. ბოლოს ქართულ და რუსულ ენაზე დაწერილი საკუთარი ლექსები წაიკითხა. აშკარად შევატყვე საეთერო საუბრით კმაყოფილი იყო.
როცა სტუდიიდან გამოვედით, მითხრა: ერთ რამეში მინდა გამოგიტყდე: ჩემი ლექსების კრებული თქვენს კოლეგას დავპირდი ტელეში და მას მოვუტანეო, მაგრამ ახლა გადავიფიქრე და მინდა თქვენ გაჩუქოთო. ოღონდ, წიგნზე სამახსოვრო წარწერის გადაკეთება მომიწევს და არ მიწყინოთო. მერე კალამი მოიმარჯვა ყვავილი მოხატა და იქ ჩემი სახელი გაჩნდა.
ასეთი იყო ნიკო გომელაური – ქართული სცენის რობინ ჰუდი. თეატრის მიღმა თამაშს არ ცნობდა და ცხოვრობდა ისე, როგორც გრძნობდა. დღეს მისი დაბადების დღეა…
ისე მართლა, ნეტავი იქ თეატრი არის?“ – წერს ჟურნალისტი სოციალურ ქსელში.
