ამერიკული გამოცემა New York Post-ი საქართველოს ერთ-ერთ ყველაზე სკანდალურ ფინანსისტს — გიორგი ბაჩიაშვილს — ეხება და მის მაიამურ ქონებასთან დაკავშირებულ გარიგებას აშუქებს, რომელმაც რეგიონში ახალი ფასობრივი რეკორდი დაამყარა.
41 წლის ბაჩიაშვილი ფართოდ ცნობილია, როგორც ბიტკოინით მოვაჭრე ქართველი ინვესტორი, რომლის ბიოგრაფიაც, გამოცემის შეფასებით, ჯაშუშური თრილერის სიუჟეტს უფრო ჰგავს, ვიდრე ჩვეულებრივი ბიზნესმენის ცხოვრებას. 2025 წლის მარტში მას საქართველოს სასამართლომ 11 წლიანი პატიმრობა მიუსაჯა დაუსწრებლად — ბიძინა ივანიშვილის კუთვნილი ბიტკოინების მითვისების ბრალდებით. ბაჩიაშვილმა ქვეყანა განაჩენამდე დატოვა, ბრალდებები კი პოლიტიკური შეკვეთით მოტივირებულად შეაფასა.
მოგვიანებით, იმავე წლის მაისში, ის, მისი ადვოკატის ინფორმაციით, აბუ-დაბიდან გაიტაცეს და საქართველოში იძულებით დაბრუნდა. ციხეში ერთ წელზე ნაკლები ვადა გაატარა — საპროცესო შეთანხმების საფუძველზე გათავისუფლდა და 2026 წლის თებერვალში პატიმრობა დატოვა. მისი ამჟამინდელი ადგილსამყოფელი ოფიციალურად გაუცხადებელია.
სწორედ ციხიდან გამოსვლიდან დაახლოებით ექვსი თვის შემდეგ, აგვისტოს შუა რიცხვებში, ბაჩიაშვილმა მაიამის დაცულ ჰიბისკუსის კუნძულზე — South Hibiscus Drive 270 — მდებარე ვილა გასაყიდად გამოიტანა. გარიგება The Real Deal-მა გახსნა: ქონება 51,5 მილიონ დოლარად გაიყიდა, რაც ამ ტერიტორიაზე დადებული ყველაზე ძვირადღირებული უძრავი ქონების გარიგებაა.
სახლი ბაჩიაშვილმა 2021 წელს 19 მილიონ დოლარად შეიძინა, მაშინ ის დაუსრულებელი კარკასი იყო. შემდგომ მან ინტერიერისა და ექსტერიერის მოსაწყობად სამხრეთაფრიკული არქიტექტურული სტუდია SAOTA დაიქირავა, რომელმაც შენობა ძირფესვიანად გარდაქმნა.
დღეს ეს ვილა ხუთ საძინებელს, მოსამსახურის ოთახს, ექვს სრულ სველ წერტილს, სამუშაო კაბინეტს, სპორტულ დარბაზს, კერძო კინოთეატრს ბარით და შეფ-სამზარეულოს მოიცავს. სახლს 36,5 მეტრიანი წყლისპირა ფასადი და ორი კერძო ნავმისადგომი აქვს, სადაც 32-მეტრიანი იახტის განლაგებაც შესაძლებელია. ტერიტორიაზე ასევე საცურაო აუზია.
ვინ გახდა ამ განსაკუთრებული ქონების ახალი მფლობელი — ჯერჯერობით უცნობია.
Sheni Ambebi News
წყარო: www.ambebi.ge
