ახლო აღმოსავლეთში ომი 465 დღეა მიმდინარეობს. გრძელდება ისრაელის სამხედრო ოპერაცია ღაზის სექტორში, გასული 24 საათის განმავლობაში 28 ადამიანი დაიღუპა, შედეგად ომის დაწყებიდან ანკლავში დაღუპულთა საერთო რაოდენობამ 46 500-ს გადააჭარბა.
ისრაელის თავდაცვის ძალების განცხადებით, ისინი აგრძელებენ ოპერაციების ბეიტ ჰანუნში, ჩრდილოეთ ღაზაში, რომლის დროსაც აქტიურ, ახლო შეტაკებებში არიან ჩართული.
ისრაელის მედიის ცნობით, შეტაკებების დროს 4 ჯარისკაცი დაიღუპა და 6 დაიჭრა.
ისრაელის პრემიერ-მინისტრმა და აშშ-ის მოქმედმა პრეზიდენტმა, სატელეფონო საუბარი გამართეს, რომლის დროსაც მოლაპარაკებებისა და მძევლების გათავისუფლების შესახებ პროგრესი განიხილეს.
ბენიამინ ნეთანიაჰუმ ბაიდენს მიაწოდა ინფორმაცია კატარში მოლაპარაკებებისთვის მიცემული მანდატის შესახებ მძევლების გათავისუფლების მცდელობების გასაძლიერებლად, მანამდე კვირას ისრაელის დელეგაცია დოჰაში ჩავიდა.
მიუხედავად იმისა, რომ ისრაელისა და პალესტინის ოფიციალურმა პირებმა მოლაპარაკებებში პროგრესის შესახებ განაცხადეს, დეტალების შესახებ ინფორმაცია მცირეა.
ისრაელსა და “ჰამასს” შორის არაპირდაპირი მოლაპარაკებების მთავარ პრობლემად ცეცხლის შეწყვეტის საკითხი რჩება. “ჰამასი” მუდმივ ზავას ითხოვს, ხოლო ისრაელი დაჟინებით მოითხოვს ბრძოლების დროებით შეჩერებას და ხაზს უსვამს, რომ სამხედრო ოპერაციები უსაფრთხოებისთვის საჭიროების შემთხვევაში შეიძლება განახლდეს.
