11 სექტემბერს მართლმადიდებელი ქრისტიანები იოანე ნათლისმცემლის სიკვდილის დღეს იხსენებენ. ეს თარიღი ეკლესიური კალენდრით ერთ-ერთი განსაკუთრებული სამარხვო დღეა, რომელსაც მრევლი მოკრძალებით ხვდება.
იოანე ნათლისმცემელი ქრისტიანული სარწმუნოების ისტორიაში განსაკუთრებული ადგილი უკავია — სწორედ მისი ხელიდან მიიღო იესო ქრისტემ ნათლობა, ხოლო მისი მოწამეობრივი სიკვდილი დაკავშირებულია ჰეროდე ანტიპას სასახლის ინტრიგებთან: ჰეროდიადასა და მისი ქალიშვილის სალომეას ბრძანებით მოიჭრა დიდი წინასწარმეტყველის თავი.
მაგრამ ნაკლებად ცნობილია ის, თუ რა ბედი ეწია ამ სიწმინდეს საუკუნეების განმავლობაში.
850 წელს იოანე ნათლისმცემლის თავის ქალას ნაწილები სხვადასხვა ადგილას გაჩნდა: ერთი — ქალაქ პეტრაში, პროდრომოსის მონასტერში, მეორე — კონსტანტინოპოლში, სტუდიის მონასტერში. ეს უკანასკნელი ნაწილი საუკუნეების განმავლობაში ბიზანტიის დედაქალაქში ინახებოდა და მისი ხილვა ჯერ კიდევ 1200 წელს მოახერხა რუსი მომლოცველი ანტონი ნოვგოროდელმა.
1204 წელს კი ყველაფერი შეიცვალა. მეოთხე ჯვაროსნულმა ლაშქრობამ, რომელიც ერეტიკოსებთან ბრძოლის ნაცვლად ქრისტიანი ბიზანტიელების ქალაქის დარბევით დამთავრდა, კონსტანტინოპოლი გაძარცვა. სწორედ ამ ქაოსის დროს ვალონ დე სარტონი, პიკარდიელი რაინდი, ერთ-ერთი სასახლის ნანგრევებში წააწყდა ვერცხლის თეფშს, რომელზეც შუშის ზარხუფის ქვეშ ადამიანის სახის ძვლები ინახებოდა. თეფშზე ბერძნული წარწერა მოწმობდა — ეს იოანე ნათლისმცემლის ნაწილია. მარცხენა წარბის ზემოთ შესამჩნევი ნახანჯლარი კი, ბიბლიური გადმოცემის მიხედვით, ჰეროდიადას სიძულვილის ნიშანი იყო, რომელმაც მოჭრილ თავს ხანჯალი ჩასცა.
ვალონმა სიწმინდე პიკარდიაში, ქალაქ ამიენში წაიყვანა. 1206 წლის 17 დეკემბერს ამიენის ეპისკოპოსი რიჩარდ გებეროელი საზეიმო პროცესიით მიეგება წმინდა ნაწილებს. ამ მომენტიდან ქალაქი ერთ-ერთ უმნიშვნელოვანეს სამლოცველო ადგილად იქცა.
1220 წელს ამიენში გოთური სტილის ბრწყინვალე საკათედრო ტაძრის მშენებლობა დაიწყო — სწორედ ამ სიწმინდის საბრძანისად. საფრანგეთის მეფეები — ლუდოვიკო IX, შარლ VI, შარლ VII — პირადად ჩამოდიოდნენ ამიენში სალოცავად. ლუდოვიკო IX-მ მოგვიანებით კათოლიკური ეკლესიის მიერ წმინდანად შერაცხვის პატივი დაიმსახურა.
1604 წელს რომის პაპ კლიმენტი VIII-მ ამიენის ეპისკოპოსს სიწმინდის მცირე ნაწილი სთხოვა, რათა რომში წმინდა იოანეს სახელობის ეკლესია გამდიდრებულიყო. მთავარი ნაწილი კი დღემდე ამიენის საკათედრო ტაძარში ინახება.
წმინდა დიმიტრი როსტოველის ჩანაწერების მიხედვით, თავის ქალას ნაწილები სამ სხვა ადგილასაც ინახება: ათონის დიონისეს მონასტერში, უნგრო-ვლახეთის ერთ-ერთ სავანეში და პაპ სილვესტრის სახელობის ეკლესიაში რომში.
ეს ისტორია — ომების, გადასახლებებისა და სასწაულებრივი გადარჩენების ამბავი — ერთ-ერთი ყველაზე საოცარი ქრისტიანული სიწმინდის მოგზაურობის ქრონიკაა, რომელიც თითქმის ორი ათასი წელია გრძელდება.
Sheni Ambebi News
წყარო: primetime.ge
