თბილისში, პეკინისა და ალექსანდრე ყაზბეგის გამზირების გადაკვეთაზე, ახალი სპორტული სივრცე — Hubs — გაიხსნა. პროექტი პროკრედიტ ბანკის ფინანსური მხარდაჭერით განხორციელდა და რეგიონში ამ ფორმატის პირველ სრულფასოვან სპორტულ ჰაბად იქცა.
Hubs არ არის ჩვეულებრივი სპორტული მაღაზია. მისი შემქმნელები ამბობენ, რომ იდეა სპორტული ინდუსტრიის წლობით შესწავლიდან დაიბადა. კომპანია უკვე ოპერირებს სომხეთსა და უზბეკეთში, სადაც Adidas-ის, Nike-ისა და Macron-ის teamsport-წარმომადგენლის სტატუსი აქვს. სწორედ ამ გამოცდილებამ გუნდი დაარწმუნა, რომ ბაზარზე არსებობს მყარი მოთხოვნა ისეთ სივრცეზე, სადაც სპორტის ყველა მიმართულება — პროდუქტი, ციფრული კომერცია და ადამიანური ურთიერთობა — ერთ სახურავქვეშ გაერთიანდება.
ახალ სივრცეში წარმოდგენილია Adidas Football, Nike Football და Macron-ის კოლექციები, ასევე საქართველოს ეროვნული ნაკრებისა და ქართული სპორტის ოფიციალური მერჩენდაიზი. მაღაზიის ერთ-ერთ განყოფილებაში — Print Lab-ში — მომხმარებელს საშუალება ეძლევა, პირადი შეკვეთით სპორტული პროდუქცია მოარგოს საკუთარ გემოვნებას. სივრცე ასევე მოიცავს B2B შეხვედრებისა და პრეზენტაციებისთვის გამოყოფილ ზონას, სადაც Nike-ისა და Adidas-ის პარტნიორებთან სამუშაო შეხვედრები გაიმართება.
კომპანიის კიდევ ერთი ფიზიკური სივრცეა Macron Sports Hub Tbilisi — იტალიური სპორტული ბრენდის ოფიციალური წარმომადგენლობა კავკასიასა და ცენტრალური აზიის ბაზრებზე. აქ ასევე ჩატარდება B2B პარტნიორებთან შეხვედრები.
ციფრული მიმართულებით კომპანია ავითარებს hubs.ge პლატფორმას, რომლის მიზანია, ეტაპობრივად მოიცვას ის ბაზრები, სადაც სპორტული ელექტრონული კომერცია პრაქტიკულად არ არსებობს. კონკურენტულ უპირატესობად სახელდება მიწოდების სისწრაფე — ის, რაც ხშირად ევროპული და ამერიკული პლატფორმების სისუსტეს წარმოადგენს.
პროკრედიტ ბანკიდან მოზიდული ინვესტიცია მოხმარდა თბილისის ფილიალის მოწყობასა და კომპანიის საცალო მიმართულების გაფართოებას. მომავლის გეგმებში კი — ახალი ფილიალების გახსნა რეგიონის სხვა მსხვილ ქალაქებში, სადაც ყოველი სივრცე ერთდროულად ემსახურება სპორტის მოყვარულ მომხმარებელსა და ბიზნეს პარტნიორს.
Sheni Ambebi News
წყარო: on.ge
