თბილისში, იურიდიული პროფესიით დაინტერესებულებისთვის მნიშვნელოვანი ღონისძიება გაიმართა — ქვეყნის მასშტაბით პირველად ჩატარდა იურისტთა დასაქმების ფორუმი, რომელიც დასაქმების ხელშეწყობის სახელმწიფო სააგენტოსა და „საქართველოს იურისტთა უმაღლესი სკოლის“ ორგანიზებით შედგა.
ფორუმის ფარგლებში დამწყებ და გამოცდილ იურისტებს საშუალება მიეცათ, ადგილზე გასაუბრებოდნენ 30-ზე მეტ საჯარო და კერძო სექტორის დამსაქმებელს, გაეცნონ აქტიურ ვაკანსიებს და გაიარონ წინასწარი შერჩევა.
ფორუმში წარმოდგენილი იყვნენ ისეთი უწყებები და კომპანიები, როგორიცაა:
- იუსტიციის სამინისტრო
- სახელმწიფო ინსპექტორის სამსახური
- თბილისის მერია
- კერძო იურიდიული კომპანიები
- საერთაშორისო ორგანიზაციების ადგილობრივი წარმომადგენლობები
ფორუმზე სპეციალურად სტუდენტებისთვის:
ღონისძიებაზე დასწრება განსაკუთრებით აქტუალური იყო იურიდიული ფაკულტეტების დამამთავრებელი კურსის სტუდენტებისთვის, რომლებსაც გაეცათ სტაჟირების შეთავაზებები, რაც პროფესიული გამოცდილების დაწყებისა და კავშირების გაძლიერების შესაძლებლობას ქმნის.
ფორუმის პარალელურად გაფორმდა ურთიერთთანამშრომლობის მემორანდუმი დასაქმების ხელშეწყობის სახელმწიფო სააგენტოსა და „საქართველოს იურისტთა უმაღლეს სკოლას“ შორის. დოკუმენტს ხელი მოაწერეს სააგენტოს დირექტორის მოადგილემ ხათუნა ცერცვაძემ და სკოლის დამფუძნებელმა ირმა კახიძემ. მემორანდუმი ითვალისწინებს პარტნიორობას პრაქტიკული სწავლების, სტაჟირებებისა და დასაქმების ხელშეწყობის მიმართულებით.
როგორც ორგანიზატორები აცხადებენ, იურისტთა დასაქმების ფორუმი მხოლოდ დასაწყისია და მსგავსი ტიპის ღონისძიებები მთელი საქართველოს მასშტაბით დაიგეგმება. მომდევნო ფორუმი ბათუმში გაიმართება ტურისტული სეზონის დაწყებამდე და დასაქმების შესაძლებლობებს შესთავაზებს ახალგაზრდებს სხვადასხვა სექტორში.
დასაქმების ხელშეწყობის სააგენტოს მიზანია, შექმნას პლატფორმა, რომელიც დააკავშირებს დამსაქმებლებს კვალიფიციურ კადრებთან და ხელი შეუწყობს დასაქმების შანსების გაზრდას როგორც სტუდენტებისთვის, ისე უკვე პროფესიულ საქმიანობაში ჩართული იურისტებისთვის.
#drpkhakadze #გიორგიფხაკაძე #davidiani #sheniambebi #აქხარისხია
