იაშვილის სახელობის ბავშვთა ცენტრალური საავადმყოფოს სამედიცინო დირექტორის, პროფესორ ივანე ჩხაიძის განცხადებით, ზაფხულის პერიოდში ნაწლავური ინფექციების გავრცელების თვალსაზრისით ყველაზე მაღალი რისკი სწორედ აუზებთან არის დაკავშირებული.
გადაცემაში „დილა მშვიდობისა საქართველო“ საუბრისას ჩხაიძემ განმარტა, რომ დიარეაგადატანილი ადამიანი გამოჯანმრთელების შემდეგაც გარკვეული პერიოდის განმავლობაში სხვებისთვის ინფექციის გავრცელების წყაროდ რჩება.
„ინფექციის რისკის თვალსაზრისით, აუზი და აუზის წყალი უპირობო ლიდერია. როდესაც დიარეის მქონე ადამიანი გამოჯანმრთელდება და თავს კარგად იგრძნობს, შესაძლოა აუზზე წავიდეს, თუმცა დიარეის დასრულებიდან მინიმუმ ორი კვირის განმავლობაში ის მაინც გადამდებია,“ – აღნიშნა ივანე ჩხაიძემ.
მისივე თქმით, დამატებით პრობლემას ისიც ქმნის, რომ აუზში ჩასვლამდე შხაპის მიღების წესს ბევრი არ იცავს.
„როგორც კი დიარეაგადატანილი ადამიანი, შხაპის მიღების გარეშე, აუზში ჩავა, მის გარშემო მყოფი ადამიანებიც რისკის ქვეშ აღმოჩნდებიან. წყლის მცირე რაოდენობის გადაყლაპვაც კი შესაძლოა ნაწლავური ინფექციის გადაცემის მიზეზი გახდეს,“ – ამბობს ექიმი.
პროფესორის განმარტებით, ამ მხრივ მდინარე და ზღვა შედარებით ნაკლებ საფრთხეს წარმოადგენს, რადგან წყალი მუდმივად მოძრაობს და დიდი მოცულობის გამო ინფექციის გავრცელების რისკი მცირდება.
ჩხაიძე ასევე აღნიშნავს, რომ გავრცელებული მოსაზრება, თითქოს ქლორი ყველა ბაქტერიას ანადგურებს, სრულად სწორი არ არის.
„ხშირად ამბობენ, რომ აუზში ქლორირებული წყალია, თუმცა ნაწლავური ინფექციების გამომწვევი ზოგიერთი მიკროორგანიზმი ქლორირებულ წყალშიც გარკვეული დროის განმავლობაში ცოცხლობს. ამიტომ მხოლოდ ქლორზე იმედის დამყარება საკმარისი არ არის,“ – განმარტავს ივანე ჩხაიძე.
ექიმი მოქალაქეებს ურჩევს, აუზით სარგებლობისას ჰიგიენის წესები მკაცრად დაიცვან, შხაპი აუზში ჩასვლამდე აუცილებლად მიიღონ, ხოლო დიარეის ან სხვა ნაწლავური ინფექციის გადატანის შემდეგ აუზში შესვლისგან მინიმუმ ორი კვირის განმავლობაში თავი შეიკავონ.
