არაგვის დაცული ლანდშაფტის ფართობი 3638 ჰექტრით უნდა გაიზარდოს — შესაბამის ცვლილებებს პარლამენტი ამ ეტაპზე განიხილავს.
ინიციატივა შეეხება „არაგვის დაცული ლანდშაფტის შექმნისა და მართვის შესახებ“ კანონში შესწორებებს. პროექტის მიხედვით, არსებული ტერიტორია გაფართოვდება და მას ვაშლობის ხეობა დაემატება, რომელიც ოფიციალურად მიიღებს დაცული ლანდშაფტის სტატუსს.
განმარტებით ბარათში აღნიშნულია, რომ ამჟამად დაცული ზონა მოიცავს გუდამაყრის, არაგვის, ფშავის არაგვისა და ხევსურეთის არაგვის ხეობებს.
დოკუმენტში ასევე ხაზგასმულია, რომ ვაშლობის ხეობის დაცულ ლანდშაფტად გამოცხადება ადგილობრივი მოსახლეობის ინიციატივით მოხდა.
„ვაშლობის ხეობის უჩვეულოდ ხელსაყრელი მდებარეობა, ახლომდებარე დაცულ ტერიტორიებთან დამაკავშირებელი ტურისტული ბილიკები და ტურიზმისა და ადგილობრივი განვითარების პოტენციალი წარმოადგენს იმ მნიშვნელოვან უპირატესობას, რაც შეიძლება მოჰყვეს დაცული ზონის გაფართოებას მთიულეთსა და გუდამაყარში“, — აღნიშნულია განმარტებით ბარათში.
