Weekend Max Mara Signature-ის ახალი კოლექცია-Phantazie

0
152

Phantazie არის Weekend Max Mara Signature-ის ახალი კოლექცია 2024 წლის გაზაფხული-ზაფხულის სეზონისთვის.

ეს არის ოდა, რომელსაც მრავალმხრივი დიზაინერი არტურ არბესერი უძღვნის  ფანტაზიას, წარმოსახვას და ვენას. ავსტრიის დედაქალაქში დაბადებული და გაზრდილი არბესერი ღრმად იყო ჩაფლული ქალაქის კულტურაში, რეგულარულად ესწრებოდა თეატრალურ სპექტაკლებს, საბალეტო და საოპერო წარმოდგენებს.

ჯერ ისევ ბავშვი იყო, როცა მას იზიდავდა თითოეული პერსონაჟის ძალა და მათი კოსტიუმები, დღეს კი მისი შემოქმედება მოიცავს სრულიად სხვადასხვა სფეროებს: მოდას, კოსტიუმებს, ინტერიერსა და დიზაინს. ამ კოლექციისთვის შთაგონება არბესერს მოუტანეს ვენამ და ბალეტმა. ეს კოლექცია წარმოადგენს მე-20 საუკუნის დასაწყისის ეგრეთ წოდებულ „ჩამოშორების“ (Secession) მიმართულებას ხელოვნებაში თავისი იმ ცვლილებებითა და მოძრაობის თავისუფლებით, რომელიც დამახასიათებელია საცეკვაო ტანისამოსისთვის და რომელიც ხაზს უსვამს თავისუფლების შეგრძნებას და კომფორტს, რაც სრულ შესაბამისობაშია Weekend Max Mara-ის ღირებულებებთან.

„ვენა ჩემზე ძალიან ძლიერ გავლენას ახდენს: მისთვის დამახასიათებელია ერთგვარი სიმკაცრე, მკაფიო, ზუსტი ხაზები და გარკვეული დისციპლინა, რომელიც შერეულია რაღაც უფრო რბილთან და მსუბუქთან“, – ამბობს არბესერი.

„იდეა იმაში მდგომარეობდა, რომ სრული გასაქანი მიმეცა ამ უნიკალური მემკვიდრეობისთვის Weekend Max Mara Signature-ის პროექტში.”

ელეგანტური და თავდაჯერებული, გლამურული, მაგრამ თან ბუნებრივი, ქალური და მხიარული – ასეთი წარმოუდგენია არბესერს ქალი. ყურადღების ცენტრში ექცევა დენადი ან დეკონსტრუირებული სილუეტები. აქ წამყვან როლს ასრულებენ ხალისიანი, ხასხასა პრინტები, განსაკუთრებით კი ის ნათელი და თამამი მოტივები, რომლებიც იმეორებენ არბესერის ზეთის საღებავებით შექმნილ ნახატს.

ქსოვილებზე გამოსახული უჯრედები და ზოლები ეხმიანებიან ვენის მოდერნიზმს და კაშკაშა ფილებს, რომლებიც ზოგჯერ გამდიდრებულია მაქმანის ჩანართებით საკერებლიანი ნაკეთობის  (ეგრეთ წოდებული) პაჩვერკის ეფექტის მისაღებად. კაბები და ქვედაბოლოები არის მდიდრული,  ხალისიანი და ფურჩალებით გაწყობილი, ხოლო სპორტული ნივთები გადმოსცემენ რეპეტიციების შემდგომი პერიოდისთვის დამახასიათებელ უზრუნველობას, რომელიც ხაზგასმულია ფუფუნების შეგრძნებით. ამის საპირისპიროდ, ერთ ტონში შესრულებული ან ზოლიანი ქურთუკები, პერანგები და შარვლები აღებულია უნიფორმებისა და სამუშაო ტანსაცმლის სამყაროდან.

იგივე ეხება პრაქტიკულ სტილში შექმნილ ორბორტიან, ქამრიან საწვიმარ ლაბადას ტილოს ნაჭრის საყელოთი. ფერთა პალიტრა მოიცავს ყველა დროში აქტუალურ ან ნათელ ფერებს, ხასხასა ლურჯი ფერის, პიტნის, ბადრიჯნის ელფერებს და ბზინვარების ელფერს, რომლებიც გადმოცემულია ისეთი ახალი მასალებით, როგორებიცაა ბამბის პოპლინი, აბრეშუმი და ჯერსი (თხელი, ნაქსოვი შალი). აქსესუარებში შედის სხვადასხვა საღამოს ვერსიები  პასტიჩინოს (Pasticcino) საკულტო ჩანთისთვის, ჰაეროვანი პლიმსოლები და ახალი შლაპა ჩამოწეული ფარფლით (bucket hat).

Phantazie-ის კოლექციის წინასწარი ჩვენება გაიმართება 20 სექტემბერს მილანის მოდის კვირეულზე BUILDING-ში, მხატვარ შლომო ჰარუშის გამოფენასთან „ახლა არის შემდეგ და შემდეგ არის ახლა“ („Now Is After And then Is Now”) ერთად. ასე რომ, იჩქარეთ, სტილისა და უნიკალურობის ახალი თავგადასავლის ფარდა ეს-ესაა აიწევა და თქვენ გახდებით ვარსკვლავი.

Weekend Max Mara, რომელიც 1983 წელს გამოვიდა, როგორც უქმე დღეების გამოსასვლელი ტანსაცმლის კოლექცია, უნიკალური იდენტობისა და აქტუალური ინდივიდუალობის მქონე ნამდვილი იტალიური ცხოვრების სტილის ბრენდად ჩამოყალიბდა. დღეს Weekend Max Mara-ის მზა ტანსაცმლისა და აქსესუარების ფართო კოლექციები საკუთარ თავში ძალისხმევის გარეშე აერთიანებს აქტუალურობას და უწყვეტობას.

თანამედროვე და დახვეწილი არჩევანი ფორმალურსა და არაფორმალურს აერთიანებს ყოველდღიურ ელეგანტურობასთან კულტურული, ფართო თვალსაწიერისა და თავისუფალი სულის მქონე ქალბატონებისთვის, რომელთა ინდივიდუალობაც სცილდება მოდას და წელიწადის დროებზე მაღლა დგას.

ბრენდის მუდმივი კამპანიის ფარგლებში, Weekend Max Mara-მ წარმოადგინა თავისი Signature Capsule-ის კოლექციები, რომლებიც შექმნილი ან შთაგონებულია იმ ცნობილი შემოქმედის მიერ, რომელიც ყოველ სეზონზე ახდენს სამოდელო სახლის წესების ხელახლა ინტერპრეტაციას და ქმნის უნიკალურ გარდერობს გამორჩეული ხედვით. Weekend Max Mara-ის კოლექცია ხელმისაწვდომია 250-მდე მონო-ბრენდულ მაღაზიაში და წამყვან უნივერმაღებში მთელს მსოფლიოში.

წყარო:https://nargismagazine.ge

მასალის გამოყენების პირობები

დატოვე პასუხი

გთხოვთ, მიუთითოთ თქვენი კომენტარი!
გთხოვთ, შეიყვანოთ თქვენი სახელი აქ