საქართველოს მევენახეობა ახალ გამოწვევას აწყდება — ვაზის ფიტოპლაზმური დაავადებები სულ უფრო სერიოზულ საფრთხეს უქმნის ქვეყნის ვენახებს. ამ პრობლემის გადასაჭრელად სოფლის მეურნეობის სამეცნიერო-კვლევითი ცენტრი იტალიის ერთ-ერთ წამყვან სამეცნიერო დაწესებულებასთან — მილანის უნივერსიტეტთან — ხელი გაიმართა.
ერთობლივი კვლევის ფარგლებში, მილანის უნივერსიტეტის პროფესორი ფაბიო ქუაგლინო საქართველოში ჩამოვიდა და ცენტრის სპეციალისტებთან ერთად მასშტაბური საველე სამუშაოები ჩაატარა. მონიტორინგი მოიცავდა ჯიღაურას სასწავლო-სადემონსტრაციო ბაზასა და თელავის, ყვარლისა და მცხეთის მუნიციპალიტეტების ვენახებს, სადაც სპეციალისტებმა დაავადების სიმპტომების მქონე ვაზის ნიმუშები შეაგროვეს.
კვლევის ერთ-ერთი მთავარი სამიზნეა ოქროსფერი სიყვითლე — Flavescence dorée, რომელიც ევროპაში ვაზის ერთ-ერთ ყველაზე დამანგრეველ დაავადებად ითვლება. მეცნიერები ცდილობენ დაადგინონ, რამდენად გავრცელებულია ეს პათოგენი საქართველოს ვენახებში და რა საფრთხე ემუქრება ქვეყნის მევენახეობის სექტორს.
შეგროვებული ნიმუშების ლაბორატორიული ანალიზი პარალელურად ჩატარდება — როგორც ცენტრის ვირუსოლოგიის ლაბორატორიაში, ასევე მილანში. კვლევისთვის გამოყენებული იქნება უახლესი მოლეკულური დიაგნოსტიკის მეთოდები და სიქვენსირება, რაც მეცნიერებს საშუალებას მისცემს ზუსტად განსაზღვრონ ფიტოპლაზმების სახეობები და მათი გენეტიკური მრავალფეროვნება.
ვიზიტის ფარგლებში ქართველმა და იტალიელმა მეცნიერებმა სამუშაო შეხვედრაც გამართეს, სადაც განიხილეს კვლევის შემდგომი ეტაპები, ნიმუშების ანალიზის სტრატეგია და შედეგების ერთობლივი ინტერპრეტაციის საკითხები. მხარეები შეთანხმდნენ, რომ თანამშრომლობა გაგრძელდება და ორ ქვეყანას შორის სამეცნიერო ცოდნისა და გამოცდილების გაზიარება სისტემური სახე მიიღებს.
პროფესორ ქუაგლინოს საქართველოში ვიზიტი შოთა რუსთაველის ეროვნული სამეცნიერო ფონდის მიერ დაფინანსებული საგრანტო პროექტის ფარგლებში განხორციელდა. პროექტი მიზნად ისახავს ვაზის ფიტოპლაზმური დაავადებების გენეტიკური მრავალფეროვნების შესწავლას და ევროპულ სტანდარტებთან — EPPO-სთან — შესაბამისი სასადგურე მასალის სერტიფიცირების პროგრამის დანერგვას ქვეყანაში.
Sheni Ambebi News
წყარო: primetime.ge
