საქართველოს მე-5 პრეზიდენტი სალომე ზურაბიშვილი თბილისში გამართულ სამოქალაქო პანაშვიდს დაესწრო, სადაც ოჯახი, მეგობრები და საზოგადოების წარმომადგენლები აფხაზ ბლოგერ დაურ ბუავას უთხოვდნენ უკანასკნელ მშვიდობას.
ბუავა, რომელიც ცნობილი იყო აფხაზეთის საქართველოსთან მშვიდობიანი გაერთიანების მხარდამჭერი შეხედულებებით, 28 აგვისტოს გარდაიცვალა. პროკურატურის ინფორმაციით, სიკვდილი მეთადონის მიღებას უკავშირდება. გამოძიების ფარგლებში სამი პირი დაკავდა, მათ შორის უკრაინის მოქალაქე ქალი, რომელსაც ბუავას განსაცდელში მიტოვება ედავება.
პანაშვიდზე სალომე ზურაბიშვილმა განაცხადა, რომ დაური ერთიანი საქართველოს ოცნების სიმბოლო იყო — ახალგაზრდა, მაგრამ ჩამოყალიბებული შეხედულებებითა და მკაფიო ხედვით. მისი თქმით, ამგვარი თაობა, განურჩევლად იმისა, აფხაზეთიდან არიან თუ საქართველოს სხვა კუთხიდან, ქვეყნის მომავლისთვის სასიცოცხლოდ აუცილებელია.
“დაური იყო წარმომადგენელი და სიმბოლო იმ აფხაზეთისა და იმ საქართველოსი, რომლებსაც ერთიანი მომავალი აქვთ. დღეს მთელი საქართველო არის ჭირისუფალი და უნდა იყოს ჭირისუფალი” — განაცხადა ყოფილმა პრეზიდენტმა.
ბუავა საქართველოს მოქალაქეობის მიმღები იყო და მისი საქმიანობა ხშირად მუქარებსა და ზეწოლას იწვევდა. მისი გარდაცვალება ფართო საზოგადოებრივ გამოხმაურებას მოჰყვა, განსაკუთრებით მათ შორის, ვინც აფხაზეთის მშვიდობიანი მოგვარების პერსპექტივას იზიარებს.
Sheni Ambebi News
წყარო: on.ge
