UFC-ის მსუბუქი წონითი კატეგორიის ახალი ჩემპიონი ჯასტინ გეიჯი ილია თოფურიასთან გამარჯვების შემდეგ ემოციებს არ მალავდა და აღნიშნა, რომ გამარჯვების გასაღები მისი გამძლეობა და ბრძოლის სწორად დაგეგმილი ტაქტიკა იყო.
გეიჯის თქმით, მან იცოდა, რომ საწყის რაუნდებში თოფურია განსაკუთრებით სახიფათო იქნებოდა, ამიტომ მთავარი მიზანი პირველი რაუნდის გადატანა იყო.
„ვიცოდი, რომ ბრძოლის დასაწყისში ილიას შესაძლებლობები უმაღლეს დონეზეა და მისი შეჩერება ძალიან რთულია. დარწმუნებული ვიყავი, რომ გამძლეობის წყალობით პირველ ორ რაუნდს ღირსეულად გავუმკლავდებოდი, ხოლო მესამე რაუნდიდან უპირატესობა ჩემს მხარეს გადავიდოდა. განსაკუთრებით ძლიერი დარტყმა მივიღე ღვიძლის არეში, მაგრამ სწორედ ასეთ რთულ მომენტებში ვაჩვენებ ჩემს საუკეთესო მხარეს. მიმაჩნია, რომ ოქტაგონში ერთ-ერთი ყველაზე სტაბილური და სანახაობრივი მებრძოლი ვარ“, — განაცხადა ახალმა ჩემპიონმა.
ამ გამარჯვებით გეიჯიმ პროფესიულ კარიერაში 28-ე წარმატება მოიპოვა, ხოლო მის ანგარიშზე 5 მარცხი რჩება. მიმდინარე წლის იანვარში მან დროებითი საჩემპიონო ქამრისთვის ბრძოლაში პედი პიმბლეტი დაამარცხა, ახლა კი დივიზიონის სრულუფლებიანი ჩემპიონი გახდა.
ილია თოფურიასთვის ეს კარიერის პირველი წარუმატებელი შეხვედრა აღმოჩნდა. ქართველ-ესპანელ მებრძოლს ამ ბრძოლამდე 17 გამარჯვება ჰქონდა და პროფესიულ ასპარეზზე დაუმარცხებელი სტატუსით სარგებლობდა.
