ქსელურ მარკეტებში დღეიდან ფასდაკლებული პროდუქტების სტენდები განთავსდა

ქსელურ მარკეტებში დღეიდან ფასდაკლებული პროდუქტების სტენდები განთავსდა – მომხმარებლები აცხადებენ, რომ პირველადი მოხმარების პროდუქტებზე ფასდაკლებები განსაკუთრებით მნიშვნელოვანია პენსიონერებისა და სოციალურად ნაკლებად უზრუნველყოფილი ოჯახებისთვის.

“ძალიან მნიშვნელოვანია, პირველ რიგში, პენსიონერებისთვის. პენსიაზე რომ არიან, იმათთვის ძალიან დიდი შეღავათია პირველადი მოხმარების პროდუქტებზე რომ არის ფასდაკლება. საერთოდ ყველასთვის, მაგრამ, პირველ რიგში, ნაკლებად უზრუნველყოფილი ოჯახებისთვის საგრძნობლად იქნება შეღავათი,” – აცხადებს ერთ-ერთი მომხმარებელი.

მათი თქმით, აქციები ყოველდღიური ხარჯების შემცირებაში ეხმარებათ, განსაკუთრებით მაშინ, როცა არამალფუჭებადი პროდუქტების შეძენას შეღავათიან ფასად ახერხებენ.

“მე პირადად, ფასდაკლებების მიხედვით ვყიდულობ პროდუქტს, რომელიც არ არის მალფუჭებადი და ხანგრძლივი ვადა აქვს. როდესაც რამდენიმე სახეობის პროდუქტს ყიდულობ, ჯამში, შეღავათი გამოდის,” – აცხადებს მომხმარებელი.

როგორც მომხმარებლები აღნიშნავენ, ფასდაკლებები ნებისმიერი სავაჭრო ქსელისთვის აუცილებელია, რადგან სასურსათო პროდუქტებზე დანახარჯი ოჯახურ ბიუჯეტზე მნიშვნელოვნად აისახება.

“აუცილებელია ეს მომხმარებლისთვის. არ აქვს მნიშვნელობა ქსელს, ყველგან აუცილებელია აქციები. მთლიანობაში, რა თქმა უნდა, ეს საკმაოდ ბიუჯეტზე გადის,” – აცხადებს ერთ-ერთი მომხმარებელი.

ცნობისთვის, ქსელურ მარკეტებში დღეიდან ფასდაკლებული პროდუქტების სტენდები განთავსდა – კომპანიებში განმარტავენ, რომ მომხმარებელს სოციალურ კალათაში განთავსებული 15 სახეობის პროდუქტის შეძენა შეუძლია. “კარფური”, “სპარი”, “მაგნიტი”, “კალათა”, “უნივერსამი”, “გუდვილი”, “ზღაპარი”, “ნიკორა”, “ლიბრე” და “აგროჰაბი” – კალათის შექმნის და სასურსათო პროდუქტებზე ფასდაკლების სურვილი ყველა ქსელურმა მარკეტმა გამოთქვა.