საქართველოს ყველაზე მაღალი შენობა, დედაქალაქის ახალი არქიტექტურული სიმბოლო და გლობალური ინვესტიციების ცენტრი – თბილისში Trump Tower-ი აშენდება. 70 სართულიანი ცათამბჯენისა და მულტიფუნქციური ცენტრის მშენებლობას დონალდ ტრამპის ოჯახის კომპანია იწყებს.
პროექტი, რომელიც ამერიკული უძრავი ქონების ბიზნეს გიგანტ “საპირთან”, “არქისთან”, “ბიოგრაფი ლივინგთან”, “ბლოქსი ჯგუფთან” და “ფინვესტ ჯორჯიასთან” პარტნიორობით ხორციელდება, მაღალი კლასის რეზიდენციებს, პრემიუმ კლასის სავაჭრო ობიექტებს, მსოფლიო დონის რესტორნებსა და დასასვენებელ სივრცეებს გააერთიანებს.
ტრამპის ორგანიზაციის ოფიციალური განცხადების თანახმად, “ტრამპ თაუერ თბილისს” მსოფლიოს უდიდესი არქიტექტურული კომპანია, Gensler-ი დააპროექტებს. რელიზში, რომელსაც ტრამპის ორგანიზაცია თავის ქართველ პარტნიორებთან ერთად ავრცელებს, ვკითხულობთ, რომ თბილისს, როგორც ჩამოყალიბებულ სავაჭრო და ენერგეტიკულ დერეფანს, სულ უფრო ხშირად ადარებენ ისეთ მზარდ ფუფუნების მიმართულებებს, როგორიცაა ლისაბონი და დუბაი საწყის ეტაპზე. საქართველო კი თავისი მდიდარი კულტურული მემკვიდრეობითა და ღვინის წარმოების მრავალსაუკუნოვანი ტრადიციით, სულ უფრო მეტად პოზიციონირებს, როგორც მომავლის ქვეყანა. პროექტი უკვე მიმოიხილა ”The Wall Street Journal”-მა.
The Sapir Organization-ის თავმჯდომარის და აღმასრულებელი დირექტორის, ალექს საპირის განცხადებით, მას სჯერა, რომ ამ პროექტით შეიქმნება ახალი რეალობა საქართველოს ტრანსფორმაციული სამშენებლო პროექტების ისტორიაში და ქვეყანაში შემოვა გლობალური მასშტაბის და უმაღლესი კლასის ცხოვრების სტილი.
“საქართველოში პირველად 5 წლის ასაკში ვიყავი და იქ დაბრუნება ჩემთვის ემოციური იყო. გამახსენდა რამდენად ღრმაა ჩემი კავშირი ამ ქვეყანასთან. მეამაყება და ჩემთვის დიდი პატივია, რომ ავაშენებ ტრამპთაუერს იმ ქვეყანაში, სადაც ჩემი მშობლები დაიბადნენ და გაიზარდნენ. მჯერა, რომ ამ პროექტით ჩვენ შევქმნით ახალ რეალობას საქართველოს ტრანსფორმაციული სამშენებლო პროექტების ისტორიაში და ქვეყანაში შემოვიტანთ გლობალური მასშტაბის და უმაღლესი კლასის ცხოვრების სტილს”, – აღნიშნა ალექს საპირმა.
