5 წელი გავიდა, რაც საქართველოს პირველი პრეზიდენტის, ზვიად გამსახურდიას ვაჟი, ცოტნე გამსახურდია მძიმედ დაჭრეს. ამ დრომდე ის რეაბილიტაციის კურსს გადის. მის გვერდით მთელი ეს პერიოდი მისი მეუღლე ანა ჯაბაურია, რომელიც პერიოდულად მეუღლის ჯანმრთელობის მდგომარეობაზე სოციალურ ქსელში წერს.
- ამჯერად ანა ახალ პოსტს აქვეყნებს, სადაც წერს, რომ ცოტნე ძმისშვილმა მოინახულა. საუბარია კონსტანტინე გამსახურდიას ვაჟზე, ზვიად გამსახურდია უმცროსზე, რომელიც გერმანიაში ცხოვრობს.
“არასოდეს უცხოვრია საქართველოში ბედის უკუღმართობის გამო. შვეიცარიაში დაიბადა და გაიზარდა. ბოლო წლებია გერმანიაში, ბერლინში ცხოვრობს, დოქტორანტურაში სწავლობს, სადისერტაციო ნაშრომს ამზადებს ფილოსოფიასა და ისტორიაში. არაერთი სამეცნიერო ნაშრომისა და თარგმანის ავტორია უკვე. ჯერ მარტო მის მიერ გერმანულ ენაზე დიდი ბაბუის “დიონისოს ღიმილის” საუცხოო თარგმანი რად ღირს…
ფილოსოფოსი, ისტორიკოსი, მთარგმნელი, მუსიკოსი, და, უბრალოდ, კარგი ადამიანი – ზრდილი, თბილი, ტკბილი; ნამდვილი ინტელიგენტი, ძლიერი ქართული ფესვებითა და ევროპული დახვეწილობით – ზვიად კონსტანტინეს ძე გამსახურდია უმცროსი.ეს ის შემთხვევაა, როდესაც დიდ წინაპართა გენი შთამომავლობაზე ნამდვილად არ ისვენებს.
პ.ს. საქართველოში ხანმოკლე ვიზიტით იმყოფებოდა და ჩამოსვლისთანავე ბიძა მოინახულა, რაღა თქმა უნდა. შეხვედრა ძალიან ემოციური იყო, ძმისშვილები ცოტნეს ფავორიტი ვიზიტორები არიან” – წერს ანა ჯაბაური.
