პარლამენტის პლენარულ სხდომაზე “უცხოური გავლენის გამჭვირვალობის შესახებ“ კანონპროექტზე პრეზიდენტის ვეტოს განხილვა დაიწყო.
სალომე ზურაბიშვილის მოტივირებულ შენიშვნებს თანდართულ კანონპროექტთან ერთად პრეზიდენტის საპარლამენტო მდივანი გიორგი მსხილაძე წარადგენს.
პრეზიდენტის კანონპროექტით, „უცხოური გავლენის გამჭვირვალობის შესახებ“ კანონი ძალაში შესვლიდან მხოლოდ ერთი დღის განმავლობაში მოქმედებს.
სალომე ზურაბიშვილის მოტივირებულ შენიშვნებში მითითებულია, რომ პარლამენტის მიერ მიღებული კანონპროექტი არ შეესაბამება საქართველოს კონსტიტუციას, კონსტიტუციით გარანტირებულ ფუნდამენტურ უფლებებსა და თავისუფლებებს, ასევე ქვეყნის ევროინტეგრაციის პროცესს.
****
რუსეთის ე.წ. არამეგობრული ქვეყნებიდან ღვინის იმპორტზე გაზრდილმა გადასახადმა მიწოდება ვერ შეზღუდა ისეთი ქვეყნებიდან, როგორიც საფრანგეთი და ესპანეთია. უფრო მეტიც, ფედერალური საბაჟო შემოსავლებისა და სატარიფო რეგულირების მთავარი სამმართველოს მონაცმებით, მიწოდება გაიზარდა.
უწყების ხელმძღვანელ მაქსიმ ჩმორას განცხადებით, საიმპორტო გადასახადის ზრდამ მხოლოდ იტალიურ ღვინოებზე “იმოქმედა” და მათი იმპორტი შემცირდა. თუმცა “ესპანელი და ფრანგი მიმწოდებლები ამ გადაწყვეტილებაზე მშვიდად რეაგირებდნენ და იმპორტირებული პროდუქციის მოცულობაზე, ფაქტობრივად, არანაირი გავლენა არ მოუხდენია, რაც, პირიქით, გაიზარდა.”
****
გარემოს დაცვისა და ბუნებრივი რესურსების კომიტეტმა „კოლხეთის დაცული ტერიტორიების შექმნისა და მართვის შესახებ“ კანონში ცვლილება მეორე მოსმენით განიხილა.
მომხსენებლის, გარემოს დაცვისა და სოფლის მეურნეობის მინისტრის მოადგილის ნინო თანდილაშვილის განმარტებით, კანონპროექტის მიღების შედეგად, კოლხეთის ეროვნული პარკის ტრადიციული გამოყენების ზონაში მოსახლეობისა და
ვიზიტორებისთვის თხევად საწვავზე მომუშავე შიგაწვის ძრავიანი ნავებით გადაადგილება დაშვებული იქნება 2028 წლის 1 იანვრამდე.
****
28 მაისს, ეროვნული ბანკის სავალუტო აუქციონზე საქართველოს ეროვნულმა ბანკმა გასაყიდად 60 მილიონი აშშ დოლარი გაიტანა. ეროვნული ბანკის ინფორმაციით, სავალუტო აუქციონზე 48 700 000 აშშ დოლარი გაიყიდა. საშუალო შეწონილმა გაცვლითმა კურსმა 2.7829 შეადგინა.
****
დღეიდან ძალაში შედის „საქართველოს მთავრობასა და ჩინეთის სახალხო რესპუბლიკის მთავრობას შორის ორდინალური პასპორტების მფლობელთა სავიზო მოთხოვნებისგან ორმხრივად გათავისუფლების შესახებ შეთანხმება.
აღნიშნულის შედეგად, საქართველოს მოქალაქეებს უკვე მიმდინარე წლის 28 მაისიდან, საშუალება ეძლევათ უვიზოდ იმოგზაურონ ჩინეთის სახალხო რესპუბლიკაში და დაჰყონ ქვეყანაში შესვლის შემდეგ ერთჯერადად 30 დღე.
როგორც საგარეო საქმეთა სამინისტროში აღნიშნავენ, გასათვალისწინებელია, რომ საქართველოს მოქალაქისთვის ჩინეთში უვიზოდ გამგზავრების და ქვეყანაში ყოფნის ხანგრძლივობა არ უნდა აღემატებოდეს 90 დღეს ნებისმიერ 180 დღიან პერიოდში.
****
პარლამენტის უკანა შესასვლელთან მოქალაქეების საპროტესტო აქცია მიმდინარეობს. მსახიობები, ოპოზიციონერი პოლიტიკისები, ყოფილი დეპუტატები და საზოგადოების სხვადასხვა სფეროს წარმომადგენლები საკანონმდებლო ორგანოსთან დილიდან შეიკრიბნენ, იმისთვის, რომ გააპროტესტონ „უცხოური გავლენის გამჭვირვალობის შესახებ” კანონი, რომელსაც პრეზიდენტმა სალომე ზურაბიშვილმა ვეტო დაადო.
მოქალაქეების განცხადებით, იმ შემთხვევაში, თუ მმართველი პარტია ვეტოს დაძლევს, ეს იქნება ქვეყნის მომავლისთვის უკან გადადგმული ნაბიჯი და უარის თქმა ნატო-სა და ევროკავშირში წევრობაზე.
****
აფხაზეთის ავტონომიური რესპუბლიკის იძულებით გადაადგილებულ პირთა მინისტრ დავით ფაცაციას და აფხაზეთის ავტონომიური რესპუბლიკის სავაჭრო-სამრეწველო პალატის პრეზიდენტ გოგიტა თედორაძეს ფრანკფურტის სავაჭრო სამრეწველო პალატის პრეზიდენტმა ულრიჰ კასპერმა უმასპინძლა, სადაც მხარეებმა ისაუბრეს მომავალი თანამშრომლობის საკითხებზე, განიხილეს აფხაზეთიდან იძულებით გადაადგილებულ პირთა ეკონომიკური გაძლიერების მიმართულებით პროექტების ერთობლივად განხორციელების შესაძლებლობები.
****
ნორვეგიამ პალესტინა დამოუკიდებელ სახელმწიფოდ აღიარა. გადაწყვეტილება ძალაში დღეიდან შევიდა.
ორი დღის წინ, ნორვეგიის საგარეო საქმეთა მინისტრმა ესპენ ბარტ ეიდემ ბრიუსელში შეხვედრის დროს პალესტინის ეროვნული ხელისუფლების პრემიერ-მინისტრს, მოჰამედ მუსტაფას აღიარების დამადასტურებელი დოკუმენტი გადასცა.
