სხვადასხვა სათამაშოს და ასევე ხელსაქმის ნაკრებს ხშირად მოჰყვება დასაწებებელი პლასტმასის თვალები. სწორედ ასეთი თვალი გადაყლაპა 2 წლის ბიჭუნამ. მიუხედავად იმისა, რომ საგანი ძალიან პატარა იყო, ბავშვი მაინც ვერ გადაარჩინეს. თანაც ტრაგედია შემთხვევიდან საკმაოდ დიდი ხნის შემდეგ მოხდა.
2 წლის კაზარი დვაა-ლიდერის მშობლებმა 2022 წლის თებერვალში შენიშნეს, რომ ბავშვმა რაღაც გადაყლაპა. ბავშვი მაშინვე საავადმყოფოში წაიყვანეს და გამოკვლევები ჩაუტარეს. თუმცა, არც რენტგენი და არც ფლუოროსკოპია არ ადასტურებდნენ ბავშვის სხეულში უცხო საგნების არსებობას. თვალი პლასტმასისგან იყო დამზადებული, ამიტომ მოწყობილობებმა ეს უბრალოდ ვერ „დაინახეს“.
14 თვის განმავლობაში კაზარი ისე ცხოვრობდა, თითქოს არაფერი მომხდარა – ბავშვს არანაირი სიმპტომი და გართულება არ ჰქონია. მისი მშობლების თქმით, კაზარი იყო “საოცარი, ჭკვიანი, მხიარული და მოსიყვარულე პატარა ბიჭი”. მაგრამ 2023 წლის 26 აპრილს ყველაფერი შეიცვალა – ბავშვი კლინიკაში სასწრაფო დახმარებით მოხვდა.
სანამ ექიმები ცდილობდნენ გაეგოთ, რა დაემართა ბავშვს, კაზარი გამთენიისას გარდაიცვალა. გამოძიებამ აჩვენა, რომ ბიჭუნას სიკვდილი კუჭ-ნაწლავის ზედა ტრაქტის სისხლდენამ და ჰემორაგიულმა შოკმა გამოიწვია. მიზეზი საყლაპავი მილის რღვევა იყო და უცხო სხეული იყო, რომელმაც აორტა დააზიანა.
ბავშვის გარდაცვალება უბედურ შემთხვევას მიაწერეს, მაგრამ სამედიცინო ექსპერტები თვლიან, რომ მისი თავიდან აცილება შეიძლებოდა, თუ ბიჭს ენდოსკოპიას ჩაუტარებდნენ. ენდოსკოპია არის პროცედურა, რომლის დროსაც გრძელი, თხელი მილი პატარა კამერით საყლაპავში შედის უცხო სხეულებისა და სხვა პრობლემების აღმოსაჩენად.
რა უნდა გააკეთოთ, თუ ბავშვმა რაღაც გადაყლაპა:
Პირველი ნაბიჯი. დაამშვიდეთ თქვენი შვილი და შეეცადეთ შეინარჩუნოთ სიმშვიდე.
ნაბიჯი მეორე. თუ თქვენს პატარას არ აქვს რაიმე სიმპტომი და ნორმალურად გამოიყურება, შეგიძლიათ თავად მიმართოთ თქვენს პედიატრს.
თუ თქვენს შვილს აქვს ღებინება, ცხელება, სისხლდენა ან უჭირს ყლაპვა, სასწრაფოდ გამოიძახეთ სასწრაფო დახმარება.
თუ თქვენს შვილს აქვს ხველა ან უჭირს სუნთქვა, უცხო საგნის მოშორება უნდა სცადოთ. ერთ წლამდე ასაკის ბავშვი მუცლით მუხლზე მოათავსეთ და ზურგზე დააწექით. თუ ბავშვი ერთ წელზე უფროსია, დააწვინეთ ზურგზე, მკერდის ძვლის დაბლა რამდენჯერმე დააწექით საჩვენებელი და შუა თითით. პერიოდულად ბავშვი წამოაჯინეთ და ისევ განაგრძეთ მკერდის ძვლის დაბლა საჩვენებელი და შუა თითით დაწოლა.
მასალის გამოყენების პირობები
