ექიმი-რეპროდუქტოლოგი მანანა მგალობლიშვილი სოციალურ ქსელში საკუთარ გვერდზე საუბრობს, როგორ უნდა ვიკვებოთ, რომ წონაში დავიკლოთ:
– დღეში 4-ჯერ უნდა იკვებოთ. შეგიძლიათ, სამჯერაც. დილით, როდესაც გაიღვიძებთ, 1-2 ჭიქა წყალს დალევთ. 20-30 წუთის შემდეგ შეგიძლიათ, საუზმედ მიირთვათ ის, რაც თქვენ გესიამოვნებათ და გნებავთ. ამის შემდეგ, 3-4 საათი არაფერს მიირთმევთ, გარდა იმისა, რომ სვამთ წყალს. შემდეგ წახემსების დროა. წახემსება მცირე რაოდენობით მსუბუქ კვებას ნიშნავს. ეს ყველაზე კარგი პერიოდია იმისათვის, რომ ხილი მიირთვათ. შეგიძლიათ, ხილი ხაჭოსთან, ან მაწონთან ერთად მიიღოთ, როგორც თქვენ გსურთ. ამის შემდეგ, 3-4 საათი კვლავ არაფერს მიირთმევთ, მხოლოდ სითხეს სვამთ. შემდეგ კი სადილი მოდის. სადილი სამი ძირითადი კომპონენტისაგან შედგება. ესენია: ცილები, ხორცეულის, თევზის, სახით. შეგიძლიათ, მცენარეული ცილებიც გამოიყენოთ. ლობიო, პარკოსნები, ოსპი მიირთვათ. ასევე, კვერცხი. მეორე კომპონენტი ნახშირწყლებია. შეგიძლიათ, 1 ნაჭერი პური მიირთვათ, ასევე, წიწიბურა, კარტოფილი მიიღოთ. მესამე კომპონენტი ბოსტნეულია. ცოცხალი ბოსტნეულის სალათი შეგიძლიათ შეაზავოთ გემოვნებით, ეს იქნება წიწაკით, ძმრით, სოუსით, ზეთით თუ სხვა. ამის შემდეგ ისევ სვამთ წყალს. 3-4 საათში კი, თუ სურვილი გექნებათ, 1 ჭიქა კეფირი ან მაწონი შეგიძლიათ, დალიოთ.
მასალის გამოყენების პირობები
