მარიხუანასა და კანაფთან დაკავშირებით პასუხისმგებლობა მკაცრდება – კანონი დამტკიცებულია
პარლამენტმა „ადმინისტრაციულ სამართალდარღვევათა კოდექსში“ ცვლილებები მესამე მოსმენით დაამტკიცა, რომლის მიხედვით, მარიხუანასა და მცენარე კანაფთან დაკავშირებით პასუხისმგებლობა მკაცრდება.
მიღებული გადაწყვეტილებით, მცირე ოდენობით კანაფის – ათ გრამამდე, მარიხუანის – გამომშრალის ხუთ გრამამდე, ხოლო ნედლის ათ გრამამდე შეძენა-შენახვა-გადაზიდვის პირველი შემთხვევა ადმინისტრაციული წესით პასუხისმგებლობას გამოიწვევს. განმეორების შემთხვევაში, შეძენა-შენახვა-გადაზიდვა-გადაგზავნა გამოიწვევს სასჯელის სახით ჯარიმას, ან საზოგადოებისათვის სასარგებლო შრომას, ან თავისუფლების ერთ წლამდე ვადით აღკვეთას.
ზემოთ აღნიშნულის გარდა, კანაფის შემთხვევაში – ათი გრამიდან 155 გრამამდე, გამომშრალი მარიხუანის შემთხვევაში – ხუთი გრამიდან 70 გრამამდე, ხოლო ნედლი მარიხუანის შემთხვევაში ათი გრამიდან 150 გრამამდე შეძენა-შენახვა – ექვს წლამდე თავისუფლების აღკვეთას, ხოლო უკანონოდ დამზადება, წარმოება, გადაგზავნა ან გადაზიდვა 3-დან 7 წლამდე თავისუფლების აღკვეთას გამოიწვევს.
რაც შეეხება დიდი ოდენობით მცენარე კანაფის (155-დან 750 გრამამდე), მარიხუანის – გამომშრალის შემთხვევაში 70-დან 250 გრამამდე, ხოლო ნედლის შემთხვევაში 140-დან 500 გრამამდე შეძენა-შენახვას, ეს გამოიწვევს 5-დან 8 წლამდე პასუხისმგებლობას, ხოლო დამზადება, წარმოება, გადაზიდვა და გადაგზავნა – 6-დან 9 წლამდე.
განსაკუთრებულ დიდი ოდენობის შემთხვევაში, რაც გულისხმობს მცენარე კანაფის 750 გრამიდან და მეტს, მარიხუანის – გამომშრალის შემთხვევაში 50 გრამიდან და მეტს, ხოლო ნედლის შემთხვევაში 500 გრამიდან და მეტს, შეძენა-შენახვა გამოიწვევს თავისუფლების აღკვეთას 8-დან 20 წლამდე ან უვადო პატიმრობას.
