თბილისში მიუსაფარი ცხოველების რაოდენობის ზრდის ფონზე, გლდანის რაიონში თანამედროვე ცხოველთა თავშესაფრი აშენდება — ამის შესახებ დღეს დედაქალაქის მთავრობის სხდომაზე თბილისის მერმა კახა კალაძემ განაცხადა.
მისი თქმით, მიუსაფარი ცხოველები კვლავ ერთ-ერთ ყველაზე მნიშვნელოვან პრობლემად რჩება და არსებული თავშესაფარი ვერ პასუხობს დედაქალაქის საჭიროებებს.
რას ითვალისწინებს პროექტი?
ახალი თავშესაფარი აშენდება თანამედროვე სტანდარტების შესაბამისად და აღიჭურვება ყველა აუცილებელი ინფრასტრუქტურით, მათ შორის:
- ინდივიდუალური ვოლიერები
- საოპერაციო ბლოკები და ლაბორატორია
- პოსტოპერაციული სივრცე
- 24-საათიანი ფუნქციონირება
- უახლესი ტექნიკა და აპარატურა
მშენებლობაზე ხელშეკრულება უკვე გაფორმებულია ცხოველთა მონიტორინგის სააგენტოსა და კონტრაქტორ კომპანიას შორის. სამუშაოები უახლოეს პერიოდში დაიწყება.
კალაძის განცხადებით, მიუსაფარი ცხოველების პრობლემის გადაწყვეტის ერთ-ერთი მთავარი გზა სტერილიზაციის პროგრამების გაფართოებაა.
პოპულაციის მართვის ახალი ცენტრი უკვე აშენდა, ხოლო ვარკეთილში არსებული თავშესაფრის სრული რეაბილიტაცია მიმდინარეობს.
მერიას განსაკუთრებით აღელვებს პატრონიანი ცხოველების ქუჩაში მიტოვების მზარდი შემთხვევები, რაც პირდაპირ ზრდის მიუსაფარ ცხოველთა რაოდენობას.
„ჩვენ ამ პრობლემის გადაწყვეტაზე ერთად უნდა ვიზრუნოთ. ეს მხოლოდ მუნიციპალიტეტების პრობლემა არ არის, ყველასია. შესაბამისად, ყველას მოგვიწევს ჩართულობა. გარდა ამისა, როგორც იცით, საკანონმდებლო დონეზე არის გარკვეული ცვლილებები. ეს ყველაფერი მოგვცემს შესაძლებლობას, რომ აღნიშნული პრობლემა, რომელიც დღეს გვაქვს ქვეყანაში და განსაკუთრებით, დედაქალაქში, იყოს მოწესრიგებული. ჰუმანური მიდგომით, ცხოველების ინტენსიური სტერილიზაციის გზით, დედაქალაქში ქუჩის ცხოველების რაოდენობა მკვეთრად შემცირდება. ეს მნიშვნელოვანი საკითხია არა მხოლოდ მოსახლეობის უსაფრთხოებისთვის, არამედ თავად ცხოველებისთვისაც. უახლოეს პერიოდში უნდა მივიდეთ იმ რეალობამდე, რომ აღარ იყოს ცხოველი ქუჩის მძიმე პირობებში და ყველა მათგანს ჰყავდეს პატრონი“, – განაცხადა კახა კალაძემ.
#drpkhakadze #გიორგიფხაკაძე #davidiani #sheniambebi #აქხარისხია
