„ტაქსების ტარიფები უნდა გაიზარდოს, მანქანის შენახვა გაძვირებულია“ – ამბობს ტაქსის მძღოლი და აქტივისტი ზურაბ ბუნტური „რადიო პალისტრის გადაცემაში „თქვენი დრო“.
ზურაბ ბუნტური აღნიშნავს, რომ ტაქსების ტარიფები უკვე დიდი ხანია, რაც ერთ მაჩვენებლზეა, გაყინული და მასზე არ ასახულა არც ბენზინის თავდაპირველი გაძვირება და არც მისი გაიაფება. ამასთან ერთად, იგი ხაზგასმით ამბობს, რომ საკომისიო, რომელსაც აპლიკაციები და „ტაქსოპარკი“ იღებენ, უნდა შემცირდეს.
„საწვავი გაიაფებულა და გაძვირებულა კიდეც, მაგრამ ტაქსის ტარიფები მაინც უცვლელი რჩებოდა. რაც შეეხება უშუალოდ იმ საკომისიოს, რომლებსაც აპლიკაციები იღებენ – ამჟამად „იანდექსის“ მაგალითზე, ეს 20 პროცენტია, საიდანაც 15 მიდის აპლიკაციაში, ხოლო დანარჩენი 5 მიაქვს ტაქსოპარკს. სანამ ტაქსოპარკი შემოვიდოდა, მანამდე 15 პროცენტი იყო და მაშინაც უკმაყოფილები ვიყავით, შესაბამისად, ახლა ჩვენი მთავარი მოთხოვნაა, რომ ეს ნიშნული კვლავ 15 პროცენტს დაუბრუნდეს“, – განაცხადა ზურაბ ბუნტურმა.
ის ასევე ამბობს, რომ მძღოლებს ძალიან ძვირი უჯდებათ ავტომობილის შენახვა და ამას დამატებული წელიწადში ორჯერ ტექდათვალიერების გავლა.
„მძროლს სჭირდება ტარიფის მომატება, ვინაიდან ძვირი უჯდება მანქანის შენახვა, ტარიფი კი ამ დრომდე შეუსაბამოა. ტექდათვალიერების გავლა წელიწადში ორჯერ გვიწევს, მანქანას კი მეტი ზრუნვა ესაჭიროება. ყველაფერთან ერთად, იწყება ტურისტული სეზონი და ხშირია ქალაქგარეთ შეკვეთებიც, მაგრამ რამდენ კმ-ზეც არ უნდა წაიყვანო მგზავრი, სხვა ქალაქში რომ ჩაიყვან იქ აღარ გაძლევს შეკვეთას და უკან მგზავრის გარეშე მოდიხარ. ფაქტობრივად, მხოლოდ ბენზინის ფულს იღებ“, – თქვა ზურაბ ბუნტურმა. წყარო
მასალის გამოყენების პირობები
