სურსათის უვნებლობის სამსახურის ინფორმაციით, ჭარბი ალფატოქსინების შემცველი რძე ბაზრიდან უკვე ამოღებულია – უწყებამ დამატებითი განმარტება ცოტა ხნის წინ “კურიერთან” გააკეთა.
სპეციალისტების თქმით, საქართველო ევროპული ნორმატივებით ხელმძღვანელობს, რომელიც ამერიკულზე 10-ჯერ მკაცრია. კომპანია “სოფლის ნობათის” განცხადებაში კი ნათქვამია, რომ მოცემული პროდუქტი მომხმარებლისთვის საფრთხეს არ წარმოადგეს, თუმცა, სააგენტოს დადგენილებით, არსებობს ვარაუდი, რომ ის შესაძლოა ზოგიერთ ადგილობრივ მოთხოვნას არ აკმაყოფილებდეს.
იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე ამბობს, რომ მონაცემები, რომლებიც სურსათის სააგენტომ გაავრცელა ნორმის გადაჭარბებაზე მიუთითებს, თუმცა ის არ წარმოადგენს ტოქსიურ მაჩვენებელს.
„ის მონაცემები, რასაც გვაძლევს სურსათის ეროვნული სააგენტო, მიუთითებენ ქვეყანაში მიღებული ნორმის გადაჭარბებაზე, რომელიც გაცილებით ნაკლებია, ვიდრე სხვა ქვეყნებში, მაგრამ ეს არ არის ტოქსიური მაჩვენებელი. ტოქსიურ მაჩვენებლად ჩვენ განვიხილავთ იმ ციფრს, რომელიც მკვეთრად აღემატება დასაშვებ ნორმას. აქედან გამომდინარე რისკი იმისი, რომ ის მაჩვენებელი ალფატოქსინის, რომელიც დაფიქსირდა რძეში, პირდაპირი ზეგავლენის მომხდენი ყოფილიყო ბავშვის ჯანმრთელობაზე რა თქმა უნდა არ არსებობს“, – აცხადებს მ. იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე.
