საჩხერის სამედიცინო ცენტრში მეზენქიმური ღეროვანი უჯრედების ლაბორატორია გაიხსნა. ეს საქართველოში პირველი სივრცეა, რომელიც სამედიცინო სფეროში მკურნალობის უნიკალურ შესაძლებლობას იძლევა.
საჩხერის სამედიცინო გუნდმა პრაქტიკა გერმანიის, შვეიცარიის და სხვა მსგავსი ლაბორატორიების გამოცდილებებით დანერგა.
უნიკალური სამედიცინო სივრცე ბიძინა ივანიშვილის და ეკატერინე ხვედელიძის ინიციატივით შეიქმნა და აღიჭურვა, რომლის ბიუჯეტმაც ორ მილიონ ლარს უკვე გადააჭარბა.
„ქალბატონი ეკატერინე ხვედელიძის დონაციით შევიძინეთ ისეთი მწარმოებლის აპარატურა როგორიცაა „ზეისი“, „თერმოფიშერი“ და სხვა ცნობილი ბრენდების მიერ წარმოებული სამედიცინო აპარატურა. მოვაწყვეთ სივრცე, გავიარეთ კონსულტაციები მსგავს ლაბორატორიებთან წამყვან ქვეყნებში. მცდელობა გვქონდა გაგვეზარდა ღეროვანი უჯრედები და წარმატებულად გავიარეთ. პარალელურად, ჩვენ დავნერგეთ საჩხერის სამედიცინო ცენტრში ისეთი ლაბორატორიული კვლევები, რომელიც საშუალებას გვაძლევს შევისწავლოთ უკვე გაზრდილი ღეროვანი უჯრედების თავისებურებები“, – განაცხადა საჩხერის საავადმყოფოს დირექტორმა მიშა ქამუშაძემ.
